കോവിഡ് പരിശോധന പുതിയ സംവിധാനവുമായി യുഎഇ

30 മുതൽ 60 സെക്കൻഡുകൾക്കകം കോവിഡ് പരിശോധിച്ചറിയാനുള്ള സംവിധാനവുമായി യുഎഇ. ഇസ്രയേൽ കമ്പനിയായ നാനൊസെന്റുമായി സഹകരിച്ചാണ് കോവിഡ് പരിശോധനയിൽ വിപ്ലവകരമായ മാറ്റത്തിനു യുഎഇ കൈകോർത്തത്. ഇസ്രയേലിനു പുറത്ത് ഈ സംവിധാനം ലഭ്യമാകുന്ന ആദ്യ രാജ്യമാണ് യുഎഇ. വിഡിയോ കോൺഫറൻസ് വഴി യുഎഇയും ഇസ്രയേലും സംയുക്തമായി നടത്തിയ വാർത്താസമ്മേളനത്തിലാണ് ഇക്കാര്യം അറിയിച്ചത്. ഇതുസംബന്ധിച്ച ധാരണാപത്രത്തിൽ യുഎഇയുടെ ജി42 ഹെൽത്ത് കെയറും  ഇസ്രയേലിന്റെ നാനോസെന്റും ഒപ്പുവച്ചു. മൂക്കിലൂടെ പുറത്തുവിടുന്ന വായുവിനെ ഒരു പ്രത്യേക ബാഗിൽ ശേഖരിച്ചാണ് പരിശോധന. സെൻസർ ബാഗുമായി ബന്ധിപ്പിച്ചിരിക്കുന്നതിനാൽ നിമിഷനേരം കൊണ്ട് ഫലം ലഭിക്കും. എസ്എംഎസ് ആയി വിവരം ഉപഭോക്താക്കൾക്കു കൈമാറും. സെപ്റ്റംബർ മുതൽ യുഎഇയിൽ വ്യാപകമാക്കാനാണു തീരുമാനമെന്ന് ജി42 ഹെൽത്ത് കെയർ സിഇഒ ആഷിഷ് കോഷി  പറഞ്ഞു. കര, നാവിക, വ്യോമ കവാടങ്ങളിലായിരിക്കും ഇവ തുടക്കത്തിൽ ലഭ്യമാക്കുക. അബുദാബിയിലേക്കു കടക്കാൻ കോവിഡ് നെഗറ്റീവ് സർട്ടിഫിക്കറ്റ് വേണമെന്നിരിക്കെ ഗന്തൂത്തിലെ പ്രവേശന കവാടത്തിലും ഇവ ലഭ്യമാക്കിയാൽ നിമിഷ നേരംകൊണ്ട് നൂറുകണക്കിന് ആളുകളെ പരിശോധിക്കാമെന്നും സൂചിപ്പിച്ചു. ഇതുവഴി പണവും സമയവും ലാഭിക്കാനും തിരക്കും കുറയ്ക്കാനും സാധിക്കും സ്കൂൾ തുറക്കുന്ന സമയമായതിനാൽ ആയിരക്കണക്കിന് വിദ്യാർഥികളെ കുറഞ്ഞ സമയംകൊണ്ട് പരിശോധിക്കാനും ഇതുവഴി സാധിക്കും. റാപ്പിഡ്, പിസിആർ ടെസ്റ്റുകളെ പോലെ സ്രവങ്ങളെടുത്ത് പരിശോധിക്കേണ്ടതില്ല.  ഇതര പരിശോധനകളെ അപേക്ഷിച്ച് ചെലവും കുറവാണ്.