പൗരത്വ നിയമത്തിന്‌‌ ഭേദഗതി, കേന്ദ്രസർക്കാരിന്‌ ചേംബർ നോട്ടീസ്‌

പൗരത്വ ഭേദഗതി നിയമത്തിന്‌‌ എതിരെ ഭരണഘടനയുടെ 131–-ാം അനുച്ഛേദപ്രകാരം കേരള സർക്കാർ ഫയൽ ചെയ്‌ത ഒറിജിനൽസ്യൂട്ടിൽ കേന്ദ്രസർക്കാരിന്‌ ചേംബർ നോട്ടീസ്‌. സ്യൂട്ടിൽ നേരത്തേ പുറപ്പെടുവിച്ച നോട്ടീസ്‌ അറ്റോർണിജനറലിന്റെ ഓഫീസ്‌ കൈപ്പറ്റിയിട്ടും നിയമമന്ത്രാലയം വക്കാലത്ത്‌ ഫയൽ ചെയ്‌തില്ല. ഇതേത്തുടർന്ന് കഴിഞ്ഞ ആഴ്‌ച സുപ്രീംകോടതി രജിസ്‌ട്രി ചേംബർ നോട്ടീസ്‌ പുറപ്പെടുവിച്ചു. കേരളത്തിന്റെ സ്‌റ്റാൻഡിങ് കോൺസൽ ജി പ്രകാശ്‌ ചേംബർ നോട്ടീസ്‌ നിയമമന്ത്രാലയത്തിന്‌ കൈമാറി. നോട്ടീസ്‌ കൈപ്പറ്റിയെന്ന്‌ അറിയിച്ച്‌ നിയമമന്ത്രാലയം നൽകിയ കുറിപ്പ്‌ സ്‌റ്റാൻഡിങ് കോൺസൽ രജിസ്‌ട്രിയിൽ തിരികെ ഫയൽ ചെയ്‌തു. സെപ്‌തംബർ 21ന്‌ ചേംബർ ജഡ്‌ജി മുമ്പാകെ സ്യൂട്ട്‌ പരിഗണിക്കുമെന്ന്‌‌ സമൻസിൽ പറയുന്നു‌. അതിനുള്ളിൽ നിയമമന്ത്രാലയം വക്കാലത്ത്‌ ഫയൽ ചെയ്യണം. വക്കാലത്ത്‌ ഫയൽ ചെയ്‌തില്ലെങ്കിൽ സ്യൂട്ടിനെ കേന്ദ്രസർക്കാർ എതിർക്കുന്നില്ലെന്നാണ്‌ നിയമപരമായ അർഥം. ജനുവരിയിലാണ്‌ പൗരത്വ ഭേദഗതി നിയമം ചോദ്യംചെയ്‌ത്‌ കേരള സർക്കാർ സുപ്രീംകോടതിയിൽ ഒറിജിനൽസ്യൂട്ട്‌ ഫയൽ ചെയ്‌തത്‌. പൗരത്വ ഭേദഗതി നിയമം ഭരണഘടനാവിരുദ്ധമെന്ന്‌ പ്രഖ്യാപിക്കണം, നിയമം റദ്ദാക്കണം തുടങ്ങിയ ആവശ്യങ്ങളാണ്‌ പ്രധാനമായും ഉന്നയിച്ചത്‌. കേന്ദ്രസർക്കാരും സംസ്ഥാനസർക്കാരും തമ്മിലുള്ള തർക്കവിഷയങ്ങളിൽ ഇടപെട്ട്‌ ഉചിതമായ തീരുമാനമെടുക്കാൻ സുപ്രീംകോടതിക്ക്‌ അധികാരം നൽകുന്ന ഭരണഘടനയുടെ 131–-ാം അനുച്ഛേദപ്രകാരം കേരളം ഒറിജിനൽസ്യൂട്ട്‌ ഫയൽ ചെയ്‌തത്‌ ദേശീയ തലത്തിൽ ശ്രദ്ധിക്കപ്പെട്ടിരുന്നു. രാജ്യമൊട്ടാകെ പ്രതിഷേധകൊടുങ്കാറ്റുയർത്തിയ പൗരത്വ ഭേദഗതി നിയമത്തിനെതിരെ ആദ്യമായി സുപ്രീംകോടതിയെ സമീപിച്ച സംസ്ഥാനമാണ്‌ കേരളം.