അനില്‍ നമ്പ്യാര്‍ ചെന്നിത്തലയുടെ പ്രിയന്‍

സ്വര്‍ണകടത്ത് കേസില്‍ കസ്റ്റംസ് ചോദ്യം ചെയ്ത അനില്‍ നമ്പ്യാര്‍ പ്രതിപക്ഷ നേതാവ് ചെന്നിത്തലയുടെ വിശ്‌സ്ഥന്‍. കെ കരുണാകരന്റെ വിശ്‌സ്ഥനായിരുന്ന കെ വി തോമസിനെ തകര്‍ക്കാന്‍ വ്യാജരേഖ ചമച്ചത് അന്ന് അനില്‍ നമ്പ്യാരെ ഉപയോഗിച്ചായിരുന്നു. കോണ്‍ഗ്രസ്സിലെ ഗ്രൂപ്പ് വഴക്കുകളുടെ ഭാഗമായി രൂപം കൊണ്ട വ്യാജരേഖ കേസിലും ഇദ്ദേഹം ഉള്‍പ്പെട്ടു. അന്നത്തെ ടൂറിസം മന്ത്രിയായിരുന്ന പ്രഫ. കെ വി തോമസ്സിന്റെ പ്രതിച്ഛായ തകര്‍ക്കുകയെന്ന ഉദ്ദേശ്യത്തോടെ ഐ ഗ്രൂപ്പ് നിര്‍മിച്ച വ്യാജരേഖയുപയോഗിച്ച് അനില്‍ വലിയ വിവാദം സൃഷ്ടിച്ചു. തോമസ്സിനെ ഹവാല കേസില്‍ ഉള്‍പ്പെടുത്തി. എങ്കിലും ഒടുവില്‍ സത്യം പുറത്തുവന്നു. അനില്‍ നമ്പ്യാര്‍ മറ്റൊരു പത്രപ്രവര്‍ത്തകനൊപ്പം അറസ്റ്റിലായി. ഇപ്പോള്‍ ഇടതു പക്ഷത്തിനൊപ്പം നില്‍ക്കുന്ന ശോഭന ജോര്‍ജായിരുന്നു ആ കേസില്‍ അന്ന് ബലിയാടായ രാഷ്ട്രീയ നേതാവ്. പൊലീസ് കേസില്‍ ശോഭനയാണ് പ്രതിസ്ഥാനത്ത് വന്നത്. 2000ഫെബ്രുവരി 6 ന് പട്ടാപ്പകല്‍ ആളുകള്‍ നോക്കി നില്‍ക്കേ പത്മതീര്‍ത്ഥ കുളത്തില്‍ ഒരാളെ മുക്കിക്കൊല്ലുന്നത് അനില്‍ നമ്പ്യാരും കൂട്ടരും ക്യാമറയില്‍ പിടിച്ചെടുത്തു. ഇത്തരമൊരു വാര്‍ത്ത ഷൂട്ട് ചെയ്ത് പുറത്തുവിട്ട ചാനലും നമ്പ്യാരും വലിയ തോതില്‍ വിമര്‍ശിക്കപ്പെട്ടു. മാത്രമല്ല, അന്ന് ഡസ്‌കിലുണ്ടായിരുന്ന പ്രശസ്തനായ മാധ്യമപ്രവര്‍ത്തകന്‍ ഇതില്‍ പ്രതിഷേധിച്ച് താനിനി ചാനലിലേക്കില്ലെന്ന് പ്രഖ്യാപിച്ച് പത്രപ്രവര്‍ത്തനം തന്നെ അവസാനിപ്പിച്ചു. ഏതായാലും അനില്‍ നമ്പ്യാര്‍ക്ക് അത് ഗുണം ചെയ്തു. അദ്ദേഹം സൂര്യടിവിയുടെ ഹെഡ് ആയി. അനില്‍ നമ്പ്യാരെ ചോദ്യംചെയ്യലിന് വിളിപ്പിച്ചതിന് തൊട്ട് പിന്നാലെ ബിജെപിക്ക് ജനം ടിവിയുമായും അനില്‍ നമ്പ്യാരുമായും യാതൊരു ബന്ധമില്ലെന്ന് വ്യക്തമാക്കി ബിജെപി സംസ്ഥാന പ്രസിഡന്റ് കെ സുരേന്ദ്രന്‍ രംഗത്ത് വന്നിരുന്നു. ഇതോടെ അനില്‍ നമ്പ്യാരെ ബിജെപി കൈവിട്ടു എന്നു വ്യക്തമായിരുന്നു. ഇതിന് പിന്നാലെ അനില്‍ നമ്പ്യാര്‍ ജനം ടിവിയില്‍ നിന്നും സ്വയം ഒഴിവാക്കുന്നു എന്നു പ്രഖ്യാപിച്ചിരുന്നു. എന്നാല്‍ അനില്‍ നമ്പ്യാര്‍ ഒഴിവായതല്ല മറിച്ച് ഒഴിവാക്കിയതാണ് എന്നു വ്യക്തമാക്കി ജനം ടിവി എംഡി വിശ്വരൂപന്‍ കൂടി രംഗത്ത് വന്നതോടെ ചാനലും അനില്‍ നമ്പ്യാരെ കൈവിടുന്നു എന്നാണ് വിവരം.