അബുദാബിയിലും ദുബായിലും റസ്റ്റോറന്റുകളില്‍ സ്‌ഫോടനം

ദുബായിലെ റസ്റ്ററന്റില്‍ പാചകവാതകം ചോര്‍ന്നുണ്ടായ പൊട്ടിത്തെറിയില്‍ ഏഷ്യക്കാരന്‍ മരിച്ചു. റസ്റ്ററന്റിന് അകത്തുണ്ടായിരുന്നയാളാണ് മരിച്ചതെന്ന് സിവില്‍ ഡിഫന്‍സ് പറഞ്ഞു. പുലര്‍ച്ചെ 4.31ന് ഇന്റ്ര്‍നാഷനല്‍ സിറ്റിയിലായിരുന്നു അപകടം. നാല് നില കെട്ടിടത്തിന്റെ താഴത്തെ നിലയില്‍ പ്രവര്‍ത്തിക്കുന്ന റസ്റ്ററന്റില്‍ പാചക വാതകം ചോര്‍ന്ന് പൊട്ടിത്തെറിയുണ്ടാവുകയായിരുന്നുവെന്ന് അധികൃതര്‍ അറിയിച്ചു. നാദ് അല്‍ ഷെബാ ഫയര്‍ സ്റ്റേഷനില്‍ നിന്നെത്തിയ അഗ്‌നിശമന സേന മിനിറ്റുകള്‍ക്കകം തീ നിയന്ത്രണവിധേയമാക്കി. സുരക്ഷാ മുന്‍കരുലിന്റെ ഭാഗമായി കെട്ടിടത്തിലെ താമസക്കാരെ ഒഴിപ്പിച്ചു. പൊലീസ് അന്വേഷണം ആരംഭിച്ചു. അബുദാബിയിലും സമാനമായ രീതിയില്‍ റസ്റ്ററന്റില്‍ സ്‌ഫോടമുണ്ടായി. അവിടെ തലസ്ഥാന നഗരിയിലെ ഫാസ് ഫൂഡ് റസ്റ്ററന്റില്‍ സ്‌ഫോടനം. 2 പേര്‍ മരിച്ചു. ഒട്ടേറെ പേര്‍ക്ക് പരുക്കേറ്റു. റസ്റ്ററന്റ് സ്ഥിതി ചെയ്യുന്ന താഴത്തെ നിലയാകെ തകര്‍ന്നു. തൊട്ടടുത്ത് നിര്‍ത്തിയിട്ടിരുന്ന വാഹനങ്ങള്‍ക്കും കേടുപാടുകള്‍ സംഭവിച്ചു. ഇന്ന് രാവിലെ റാഷിദ് ബിന്‍ സഈദ് സ്ട്രീറ്റി(എയര്‍പോര്‍ട് റോഡ്)ലാണ് സ്‌ഫോടനമുണ്ടായത്. പാചകവാതക ചോര്‍ച്ചയാണ് സ്‌ഫോടനത്തിന് കാരണമെന്ന് സംശയിക്കുന്നു. റസ്റ്ററന്റിനകത്തുണ്ടായിരുന്നയാളും അടുത്തുകൂടെ നടന്നുപോവുകയായിരുന്നയാള്‍ കെട്ടിടാവശിഷ്ടങ്ങള്‍ പതിച്ചുമാണ് മരിച്ചതെന്ന് പൊലീസ് പറഞ്ഞു. പരുക്കേറ്റവരെ ആശുപത്രിയില്‍ പ്രവേശിപ്പിച്ചു. ഉടന്‍ സ്ഥലത്തെത്തിയ പൊലീസും അടിയന്തര സേനയും റസ്റ്ററന്റ് സ്ഥിതി ചെയ്യുന്ന കെട്ടിടത്തില്‍ താമസിക്കുന്നവരെ ഒഴിപ്പിച്ച ശേഷം ഈ പ്രദേശമാകെ നിയന്ത്രണത്തിലാക്കി. റാഷിദ് ബിന്‍ സഈദ് സ്ട്രീറ്റുമായി ബന്ധപ്പെടുത്തിയിട്ടുള്ള ഹസ്സ ബിന്‍ സായിദ് റോഡ് താത്കാലികമായി അടച്ചതായി പൊലീസ് ട്വീറ്റ് ചെയ്തു. മരിച്ചവരെക്കുറിച്ചുള്ള കൂടുതല്‍ വിവരം അധികൃതര്‍ പുറത്തുവിട്ടിട്ടില്ല.