വെഞ്ഞാറമൂട്∙ തേമ്പാംമൂട്ടിൽ ഡിവൈഎഫ്ഐ പ്രവർത്തകർ കൊല്ലപ്പെട്ട  സംഭവത്തിൽ   നിന്നും ഇനിയും പ്രദേശവാസികൾക്ക് നടുക്കം മാറിയിട്ടില്ല. തേമ്പാംമൂട്, വെമ്പായം  മേഖലകളിൽ  സാമൂഹിക പ്രവർത്തന രംഗത്ത് സജീവ സാന്നിധ്യമായിരുന്ന  ഡിവൈഎഫ്ഐ വെമ്പായം തേവലക്കാട് യൂണിറ്റ് ജോ.സെക്രട്ടറി വെമ്പായം തേവലക്കാട് സഫിയുൽ നിസാം മൻസിലിൽ മിഥിലാജ് (30), ഡിവൈഎഫ്ഐ പേരുമല കലുങ്കിൻമുഖം യൂണിറ്റ് സെക്രട്ടറി തേമ്പാമൂട് കലുങ്കിൻമുഖം ബിസ്മി മൻസിൽ ഹക്ക് മുഹമ്മദ് (24) എന്നിവരുടെ കൊലപാതകമാണ് നാടിനെ ദുഖത്തിലാഴ്ത്തിയത്. സുഹൃത്തായ മിഥിലാജിനെ ഓണക്കച്ചവടത്തിനു സഹായിക്കാനാണ് ഹഖ് മുഹമ്മദ് ഉത്രാട നാളിൽ വെമ്പായത്ത് പച്ചക്കറി കടയിൽ പോയത്. രാത്രി കടയടച്ചതിനുശേഷം മിഥിലാജ്, മുഹമ്മദ് ഹഖ്, മറ്റൊരു സുഹൃത്തായ ഷഹിൻ എന്നിവർ രണ്ടു ബൈക്കുകളിലായി തേമ്പാംമൂട് കലിങ്കിൻമുഖം ഭാഗത്തേക്ക് വന്നപ്പോൾ മിഥിലാജിനെയും ഹക്കിനെയും സംഘം തട‍ഞ്ഞു നിർത്തി ആക്രമിക്കുകയായിരുന്നു. ഇരുവരെയും ആക്രമിക്കുന്നതു കണ്ട ഷഹിൻ ഓടി മറ‍ഞ്ഞു. ഷഹിൻ നൽകിയ വിവരത്തെത്തുടർന്നാണ്  കൊലപാതകം മറ്റുള്ളവർ അറിയുന്നത്. നാട്ടുകാരെയും പൊലീസിനെയും അറിയിച്ച ശേഷം പരുക്കേറ്റവരെ വെഞ്ഞാറമൂട് സ്വകാര്യ മെഡിക്കൽ കോളജ് ആശുപത്രിയിൽ എത്തിച്ചുവെങ്കിലും ജീവൻ രക്ഷിക്കാനായില്ല. കൊലപാതകം നേരിൽ കണ്ട ഷഹിൻ ഇനിയും ഭയത്തിൽ നിന്നും മോചിതനായിട്ടില്ല. കോവിഡ് രോഗ വ്യാപനവും കോവിഡ് മരണവും പുല്ലമ്പാറ പ‍ഞ്ചായത്തിനെ വല്ലാതെ ബുദ്ധിമുട്ടിച്ച കാലഘട്ടമായിരുന്നു കഴിഞ്ഞ മാസം. ഇതിൽ നിന്നും മുക്തിയാകുന്നതിനു മുൻപ് തങ്ങളുടെ നാട്ടിൽ അരങ്ങേറിയ അരുംകൊല പ്രദേശവാസികളെ വല്ലാതെ നൊമ്പരത്തിലാക്കിയിരിക്കുകയാണ്. പാർലമെന്റ് തിര‍ഞ്ഞെടുപ്പുമായി ബന്ധപ്പെട്ട് നടന്ന കലാശക്കൊട്ടിൽ ആരംഭിച്ച വാക്കു തർക്കം പിന്നീട് വിവിധ സമയങ്ങളിൽ കോൺഗ്രസ്, സിപിഎം സംഘർഷത്തിനു കാരണമായിട്ടുണ്ടെന്നും ഡിവൈഎഫ്ഐ പ്രവർത്തകർക്ക് പരുക്കേറ്റിട്ടുണ്ടെന്നും ഇതിന്റെ തുടർച്ചയാണ് ഞായറാഴ്ച നടന്ന കൊലപാതകമെന്നാണ്   വെഞ്ഞാറമൂട്  പറയുന്നു.