മയക്കുമരുന്ന് കേസ് കംസ്റ്റംസ് പരിശോധിക്കുന്നു

സ്വര്‍ണക്കടത്ത് കേസും ബംഗളരു മയക്കുമരുന്ന് കേസും തമ്മില്‍ ബന്ധമുണ്ടോയെന്ന് കസ്റ്റംസ് അന്വേഷിക്കും. മയക്കുമരുന്ന് കേസിലെ പ്രതി അനൂപ് മുഹമ്മദിന്റെ ഫോണില്‍ നിന്ന് സ്വര്‍ണക്കടത്ത് കേസിലെ പ്രതി കെ.ടി.റമീസിന്റെ നമ്പര്‍ കണ്ടെടുത്ത പശ്ചാത്തലത്തിലാണ് അന്വേഷണം. റമീസ് നിലവില്‍ ജൂഡീഷ്യല്‍ കസ്റ്റഡിയിലാണുള്ളത്. ഇതുമായി ബന്ധപ്പെട്ട് റമീസിനെ ചോദ്യം ചെയ്യുന്നതിന് കോടതിയുടെ അനുമതി തേടേണ്ടതുണ്ട്. കസ്റ്റംസ് ഇതിനായി ഉടന്‍ തന്നെ അപേക്ഷ നല്‍കുമെന്നാണ് അറിയുന്നത്. റമീസും അനൂപ് മുഹമ്മദും തമ്മില്‍ ഏത് തരത്തിലുള്ള ബന്ധമാണ് ഉള്ളത്. ഇടപാടുകള്‍ എന്തെങ്കിലും നടന്നിട്ടുണ്ടോ തുടങ്ങിയ കാര്യങ്ങള്‍ അന്വേഷിക്കും. സ്വര്‍ണക്കടത്ത് കേസിലെ പ്രധാന പ്രതി സ്വപ്ന സുരേഷ് ബെംഗളൂരുവില്‍ ഒളിവില്‍ കഴിഞ്ഞതുമായി ബന്ധപ്പെട്ട ചില ആരോപണങ്ങളും ഉയര്‍ന്നിരുന്നു. സ്വര്‍ണക്കടത്തും ലഹരിമരുന്നു കടത്തും തമ്മിലെ ബന്ധം സംസ്ഥാന സര്‍ക്കാര്‍ അന്വേഷിക്കാത്തത് എന്തെന്ന് ബിജെപി സംസ്ഥാന അധ്യക്ഷന്‍ കെ.സുരേന്ദ്രന്‍ ആസ്ലാപണം ഉന്നയിച്ചിരുന്നു. അത് ബന്ധപ്പെട്ട ഏജന്‍സികള്‍ പരിശോധിക്കുമെന്നായിരുന്നു മുഖ്യമന്ത്രിയുടെ മറുപടി. സ്വര്‍ണക്കടത്തിനുള്ള നിക്ഷേപകരെ കണ്ടെത്താനുള്ള ഉത്തരവാദിത്വം റമീസിനായിരുന്നു. റമീസും ജലാലും ചേര്‍ന്നാണ് നിക്ഷേപകരെ ആകര്‍ഷിച്ചിരുന്നത്. രണ്ടു തരത്തിലാണ് നിക്ഷേപകര്‍ക്ക് സ്വര്‍ണക്കടത്തുസംഘം ലാഭം വാഗ്ദാനം ചെയ്തത്. നിക്ഷേപം തിരിച്ചു കിട്ടുമെന്ന് ഉറപ്പ് നല്‍കിയുള്ള ഇടപാടില്‍ ചെറിയ ലാഭം മാത്രമായിരിക്കും നല്‍കുന്നത്. ഈ ഇടപാടില്‍ സ്വര്‍ണം പിടിച്ചാലും നിക്ഷേപകര്‍ക്ക് പണം തിരികെ കിട്ടും. എന്നാല്‍ വലിയ ലാഭം വാഗ്ദാനം ചെയ്യുന്ന ഇടപാടില്‍ സ്വര്‍ണം പിടിച്ചാല്‍ നിക്ഷേപകര്‍ക്ക് വലിയ തുക നഷ്ടപ്പെടും. പിടിച്ചില്ലെങ്കില്‍ കിട്ടുന്നത് വലിയ ലാഭമായിരിക്കും. ലഹരിക്കടത്ത് സംഘത്തോട് ഇത്തരം ഇടപാടുകളില്‍ പണമിറക്കാനാണ് റമീസ് ഉപദേശിച്ചതെന്നാണ് സൂചന. സ്വര്‍ണക്കടത്തു കേസിലെ മുഖ്യപ്രതി സ്വപ്ന സുരേഷ് അറസ്റ്റിലായ ദിവസം ലഹരിസംഘത്തിലെ അനൂപിന്റെ കേരളത്തിലേക്കുള്ള ഫോണ്‍വിളികളും എന്‍.ഐ.എ. അന്വേഷിക്കുന്നുണ്ട്. ലഹരിസംഘത്തെ പിടികൂടിയ നാര്‍ക്കോട്ടിക് കണ്‍ട്രോള്‍ ബ്യൂറോയില്‍നിന്നു വിവരങ്ങള്‍ തേടിയിട്ടുണ്ട്. പ്രതികളുടെ ഡയറിയില്‍ പരാമര്‍ശിക്കുന്നവരെക്കുറിച്ചും അന്വേഷിക്കുന്നുണ്ട്.