മുല്ലപ്പള്ളിയുടെ യോഗം, അന്വേഷണം വരുന്നു

സര്‍ക്കാരിനെതിരെ ഒന്നിക്കണമെന്ന ആഹ്വനം നല്‍കി കെ പി സി സി പ്രസിഡന്റ് വിളിച്ച യോഗത്തിനെക്കുറിച്ച് സര്‍ക്കാര്‍ അന്വേഷണം തുടങ്ങും. സംസ്ഥാന സര്‍ക്കാരിന്റെ പ്രവര്‍ത്തനങ്ങള്‍ അട്ടിമറിക്കാനുള്ള കൂടിയാലോചനയ്ക്ക് കെപിസിസി പ്രസിഡന്റ് മുല്ലപ്പള്ളി രാമചന്ദ്രന്‍ വിളിച്ച യോഗത്തില്‍ ഉദ്യോഗസ്ഥര്‍ പങ്കെടുത്തത് വന്‍ വീഴ്ച്ചയാണ്. ഭരണഘടനാ സ്ഥാപനമായ പിഎസ്സിയിലെ ഉദ്യോഗസ്ഥര്‍ പങ്കെടുത്തായി റിപ്പോര്‍ട്ടുകള്‍ വന്നിട്ടുണ്ട്. പിഎസ്സി ജോയിന്റ് സെക്രട്ടറി രമേശ് തമ്പിയും സെക്ഷന്‍ ഓഫീസര്‍ മുഹമ്മദ് ജാസിയുമാണ് പങ്കെടുത്തതെന്ന് ചാനലുകള്‍ പുറത്തുവിട്ട സ്ലഖകള്‍ വ്യക്തമാക്കുന്നു. പിഎസ്സിയെ തകര്‍ക്കുന്നുവെന്ന് കുപ്രചാരണം നടത്തുന്നവരാണ് അതേ സ്ഥാപനത്തിലെ ഉദ്യോഗസ്ഥരെ പങ്കെടുപ്പിച്ച് കുത്തിത്തിരിപ്പ് ആസൂത്രണം ചെയ്തത്. സര്‍ക്കാര്‍ ജീവനക്കാര്‍ എന്നതിനൊപ്പം ഭരണഘടനാ സ്ഥാപനത്തിന്റെ ഭാഗമായ ഉദ്യോഗസ്ഥര്‍ സ്വന്തം ഉത്തരവാദിത്തത്തെയും സ്ഥാപനത്തെയും വഞ്ചിക്കുന്ന നടപടിക്ക് കൂട്ടുനിന്നതായി വ്യക്തമായ സാഹചര്യത്തില്‍ ഇവര്‍ക്കെതിരെ അന്വേഷണം ഉണ്ടായേക്കും. . പിഎസ്സിയില്‍ നിയമനത്തിനുള്ള നടപടികള്‍ ഉള്‍പ്പെടെ തടഞ്ഞുവയ്ക്കാനും ഫയലുകളുടെ ചലനവേഗം കുറയ്ക്കാനും അനുയായികള്‍ക്ക് ഈ നേതാക്കള്‍ സ്വാഭാവികമായും നിര്‍ദേശം നല്‍കുമെന്ന് വ്യക്തമാണ്. സര്‍ക്കാരിനെതിരെ രംഗത്തിറങ്ങാനും ഫയലിലെ വിവരങ്ങള്‍ ചോര്‍ത്തി നല്‍കാനുമാണ് കെപിസിസി പ്രസിഡന്റ് സര്‍ക്കാര്‍ ഉദ്യോഗസ്ഥര്‍ക്ക് നിര്‍ദേശം നല്‍കിയത്.