ബാലഭാസ്‌കറിന്റെ മരണവും സ്വര്‍ണകടത്തും സത്യം തേടി സി ബി ഐ

വയലിനിസ്റ്റ് ബാലഭാസ്‌കറിന്റെ മരണത്തിന്റെ കുരുക്ക് അഴിക്കാന്‍ സാമ്പത്തിക അന്വേഷണവും. ബാലഭാസ്‌കറിന്റെ മരണത്തിന് സ്വര്‍ണ്ണ കടത്തുമായി ബന്ധമുണ്ടെന്ന സംശയത്തെ തുടര്‍ന്നാണ് ഇത്. ബാലഭാസ്‌കറില്‍ നിന്നു വന്‍ തുക കടം വാങ്ങിയതായി സുഹൃത്ത് വിഷ്ണു സിബിഐയ്ക്ക് മൊഴി നല്‍കിയിരുന്നു. സാമ്പത്തിക ഇടപാടുകള്‍ നടത്തിയിരുന്നതായി പാലക്കാട് പൂന്തോട്ടം ആയുര്‍വേദ ആശുപത്രി നടത്തിപ്പുകാരും വ്യക്തമായിരുന്നു. ഇക്കാര്യങ്ങളും ബാലഭാസ്‌കറിന്റെ മാതാപിതാക്കളുടെ മൊഴിയും കണക്കിലെടുത്താണ് തീരുമാനം. സിബിഐ അദ്ദേഹത്തിന്റെ സാമ്പത്തിക ഇടപാടുകളെക്കുറിച്ചും പരിശോധന തുടങ്ങി. ബാങ്ക് നിക്ഷേപം , സ്വത്തുവകകള്‍ എന്നീ വിവരങ്ങള്‍ ശേഖരിക്കാനുള്ള പ്രാഥമിക നടപടി ആരംഭിച്ചു. സംഗീതജ്ഞന്‍ സ്റ്റീഫന്‍ ദേവസ്സിയുടെ മൊഴിയെടുക്കാന്‍ തീരുമാനിച്ചതായി റിപ്പോര്‍ട്ടുണ്ട്. നുണപരിശോധനയുമായി ബന്ധപ്പെട്ടു വിഷ്ണു, പ്രകാശന്‍ തമ്പി, കലാഭവന്‍ സോബി, അര്‍ജുന്‍ എന്നിവരെ 16 നു സിജെഎം കോടതിയില്‍ വിളിപ്പിച്ചിട്ടുണ്ട്. ഏത് സാഹചര്യത്തിലാണ് സ്റ്റീഫന്‍ ദേവസ്യയുടെ മൊഴി സിബിഐ എടുക്കുന്നതെന്ന് വ്യക്തമല്ല. പൊലീസ് അന്വേഷണ ഘട്ടത്തില്‍ ഒരിക്കലും ഇത് സംഭവിച്ചിരുന്നില്ല. ബാലഭാസ്‌കര്‍ അപകടത്തില്‍പ്പെട്ട് ആശുപത്രിയില്‍ കഴിയവെ സ്റ്റീഫന്‍ ദേവസി ബാലുവിനെ കാണാന്‍ എത്തിയിരുന്നു. അപകട ദിവസം അര്‍ജുനാണ് വാഹനമോടിച്ചതെന്നാണ് ബാലഭാസ്‌കറിന്റെ ഭാര്യ ലക്ഷ്മിയടക്കം ഒട്ടേറെപ്പേരുടെ മൊഴി. എന്നാല്‍ അര്‍ജുന്‍ പറയുന്നത് ബാലഭാസ്‌കറാണെന്നാണ്. അപകടത്തിന് മുന്‍പ് തന്നെ വാഹനം അടിച്ചുതകര്‍ത്തിരുന്നുവെന്നാണ് സോബി പറയുന്നത്. സോബി ജോര്‍ജിന്റെ നുണ പരിശോധന പോലും അതീവ നിര്‍ണ്ണായകമാണ്. ആര്‍ക്കും അവിശ്വസനീയമായ വെളിപ്പെടുത്തലുകളാണ് അദ്ദേഹം നടത്തിയിട്ടുള്ളത്. ശാസ്ത്രീയ പരിശോധനയില്‍ ഇവ ശരിയാണെന്ന് കണ്ടെത്തിയാല്‍ ബാലഭാസ്‌കറിന്റെ മരണത്തില്‍ ദുരൂഹതകള്‍ കൂടുകയും ചെയ്യും. 2018 സെപ്റ്റംബര്‍ 25 ന് പുലര്‍ച്ചെ കഴക്കൂട്ടം പള്ളിപ്പുറം ദേശീയ പാതയില്‍ വച്ചാണ് കാര്‍ അപകടം നടന്നത്. ഡ്രൈവര്‍ അര്‍ജുന്‍ , ബാലഭാസ്‌ക്കറിന്റെ ഭാര്യ ലക്ഷ്മി , മകള്‍ തേജസ്വിനി ബാല എന്നിവരും കാറില്‍ ഉണ്ടായിരുന്നു. മകള്‍ സംഭവസ്ഥലത്തും ബാലഭാസ്‌കര്‍ പിന്നീട് ആശുപത്രിയിലും വച്ച് മരിച്ചു.