എന്‍ ഐ എ നടപടികള്‍ കുടുക്കിലായി ബിജെപി

കേന്ദ്രമന്ത്രി വി മുരളീധരന്റെ എടുത്തു ചാടിയുള്ള നീക്കങ്ങളില്‍ സംശയം പ്രകടിപ്പിച്ച് ബി ജെ പി നേതാക്കള്‍. പാര്‍ട്ടിയെയും സംസ്ഥാനത്തെ പാര്‍ട്ടി നേതൃത്വത്തെയും തകര്‍ത്ത് സ്വന്തം ഗ്രൂപ്പ് വളര്‍ത്താനുള്ള നീക്കത്തിലാണ് മുരളീധരന്‍ എന്ന പരാതിയാണ് ഇവര്‍ ഇപ്പോള്‍ പരസ്യമായി ഉന്നയിക്കുന്നത്. സ്വര്‍ണകടത്ത് കേസില്‍ എന്‍ ഐ എ കൊടുത്ത കുറ്റപത്രവും, അതിനു മുന്‍പ് മുരളീധരന്‍ നല്‍കിയ വിശദീകരണങ്ങളും ആയുധമാക്കി സി പി എം സൈബര്‍ ഗ്രൂപ്പുകള്‍ നടത്തുന്ന പ്രചരണങ്ങള്‍ താഴേത്തട്ടില്‍ വലിയ പ്രതിസന്ധി സൃഷ്ടിക്കുന്നുവെന്ന് യുവ നേതാക്കള്‍ അഭിപ്രായം അറിയിച്ചു കഴിഞ്ഞു. കോട്ടയം നഗരസഭ കൗണ്‍സിലറുടെ നേതൃത്വത്തില്‍ കോവിഡ് രോഗിയുടെ ശവസംസ്‌കാരത്തിനെതിരെ നടന്ന സമരം , മന്ത്രിയുടെ നയതന്ത്ര ബാഗേജ് പരാമര്‍ശം എന്നിവയാണ് സോഷ്യല്‍ മീഡിയയിലും യുവവോട്ടര്‍മാരിലും വലിയ എതിര്‍പ്പുണ്ടാക്കിയതെന്നാണ് യുവമോര്‍ച്ചയുടെ നിലപാട്. സ്വര്‍ണം കടത്തിയത് നയതന്ത്രബാഗേജു വഴിതന്നെയാണെന്ന് എന്‍ഐഎ കോടതിയില്‍ വ്യക്തമാക്കിയതോടെ ഇക്കാര്യത്തില്‍ വിരുദ്ധ നിലപാട് സ്വീകരിച്ച കേന്ദ്രമന്ത്രി വി മുരളീധരന്റെ മൊഴിയും അന്വേഷണ സംഘത്തിന് എടുക്കേണ്ടിവരും എന്ന വാര്‍ത്തകള്‍ ചില മാധ്യങ്ങളിലടെ വരുന്നതും ഇവര്‍ ചൂണ്ടിക്കാണിക്കുന്നു. നയതന്ത്രബാഗേജ് വഴിയല്ല സ്വര്‍ണം വന്നത് എന്ന വി മുരളീധരന്റെ പ്രസ്താവന ഏത് സാഹചര്യത്തിലാണെന്ന് വ്യക്തത വരുത്തണമെന്നാണ് പാര്‍ട്ടിയിലെ നിലപാട്. സ്വര്‍ണം കടത്തിയത് നയതന്ത്രബഗേജിലല്ലെന്ന് ജൂലൈ എട്ടിനാണ് വിദേശ സഹമന്ത്രിയായ വി മുരളീധരന്‍ ഡല്‍ഹിയില്‍ വെളിപ്പെടുത്തിയത്. എന്‍ഐഎ അന്വേഷണം ഏറ്റെടുത്തത് ജൂലൈ പത്തിന്. നയതന്ത്ര ബാഗേജ് ആണെങ്കില്‍ യുഎഇയുമായുള്ള കേസ് ആകുമെന്നായിരുന്നു മുരളീധരന്റെ വാദം. ഇത് തള്ളി, കോണ്‍സുലേറ്റ് ഉദ്യോഗസ്ഥരെ ചോദ്യംചെയ്യണമെന്നും പ്രതിസ്ഥാനത്തേക്ക് കൊണ്ടുവരുമെന്നും എന്‍ഐഎ കോടതിയില്‍ റിപ്പോര്‍ട്ട് നല്‍കിയതോടെ വിദേശരാജ്യവുമായുള്ള കേസ് എന്ന നിലയിലേക്ക് സംഗതി മാറി. കേന്ദ്ര ധന സഹമന്ത്രി അനുരാഗ് ഠാക്കൂര്‍ പാര്‍ലമെന്റില്‍ നല്‍കിയ മറുപടിയിലും സ്വര്‍ണക്കടത്ത് നയതന്ത്രബാഗിലാണെന്ന് വ്യക്തമാക്കി. ഇതെല്ലാം കേരളത്തില്‍ മുരളീധര ഗ്രൂപ്പിന്റെ നിലപാട് പരുങ്ങലില്‍ ആക്കിയിരിക്കുകയാണ്.