കടത്തിയവരെ ചോദ്യം ചെയ്യാത്തത് എന്ത് : കാനം

സ്വര്‍ണക്കടത്ത് കേസില്‍ സംസ്ഥാന സര്‍ക്കാര്‍ എന്തുകൊണ്ട് പ്രതിക്കൂട്ടില്‍ നില്‍ക്കുന്നവെന്ന് എനിക്ക് മനസ്സിലാകുന്നില്ല. സ്വര്‍ണക്കടത്ത് നിയന്ത്രിക്കേണ്ടത് കസ്റ്റംസും കേന്ദ്ര സര്‍ക്കാരുമാണ്. ഇന്ത്യയിലെ വിവിധ വിമാനത്താവളങ്ങളില്‍ സ്വര്‍ണക്കടത്ത് നിര്‍ബാധം നടന്നുകൊണ്ടിരിക്കുകയാണ്. കേന്ദ്ര സര്‍ക്കാരിന്റേയും കസ്റ്റംസിന്റേയും പരാജയമാണ് ഇത് കാണിക്കുന്നത്. ഡിപ്ലോമാറ്റിക് ബാഗേജില്‍ സ്വര്‍ണം വന്നു എന്നാണ് കേസ്. ഇതിന്റെ അന്വേഷണം എവിടം വരെയായി? ആറ് മാസമായിട്ടും സ്വര്‍ണം അയച്ചു എന്ന് പറയുന്നയാളെ ചോദ്യം ചെയ്യാനായിട്ടില്ല. മെയ് മാസം നടക്കാനിരിക്കുന്ന തിരഞ്ഞെടുപ്പ് വരെ അന്വേഷണം നീട്ടികൊണ്ടുപോകുന്നതിനുള്ള രാഷ്ട്രീയ തന്ത്രമാണ് കേന്ദ്ര സര്‍ക്കാര്‍ ഇക്കാര്യത്തില്‍ സ്വീകരിക്കുന്നത്. ബോധപൂര്‍വ്വമായ ശ്രമമാണിത്. അതിന്റെ പേരില്‍ ഇടതുപക്ഷം പിന്നോട്ടുപോകില്ല. മുന്നണിയും സര്‍ക്കാരും ശക്തമാണ്. ആര് കുറ്റക്കാരാണെന്ന് കണ്ടാലും ആ അന്വേഷണത്തെ ഞങ്ങള്‍ സ്വാഗതം ചെയ്തിട്ടുണ്ട് മുഖ്യമന്ത്രിയും ഈ നിലപാടാണ് സ്വീകരിച്ചതെന്നും കാനം പറഞ്ഞു. സിപിഐ സംസ്ഥാന സെക്രട്ടറി കാനം രാജേന്ദ്രന്‍. ബിജെപിയുടെ രാഷ്ട്രീയ നീക്കങ്ങളെ കേരളത്തിലെ പ്രതിപക്ഷം ഏറ്റെടുത്ത് സര്‍ക്കാരിനെതിരെ ഉപയോഗിക്കാന്‍ ശ്രമിക്കുന്നുവെന്നും അദ്ദേഹം പറഞ്ഞു. മാതൃഭൂമി ചാനലിന്റെ ചോദ്യം ഉത്തരം പരിപാടിയിലാണ് കാനം നിലപാടുകള്‍ വ്യക്തമാക്കിയത്. കേന്ദ്ര ഏജന്‍സികള്‍ക്ക് ആരെ വേണമെങ്കിലും ചോദ്യം ചെയ്യാം. ചോദ്യം ചെയ്തതിന്റെ പേരില്‍ ഒരു മന്ത്രിയും ഇതുവരെ രാജിവെച്ചിട്ടില്ല. കേസില്‍ ആരോപിതയായ സ്ത്രീയുമായി ശിവശങ്കറിന് ബന്ധമുണ്ട് എന്നതിനാലാണ് മുഖ്യമന്ത്രിയുടെ പ്രസിന്‍സിപ്പല്‍ സെക്രട്ടറി സ്ഥാനത്ത് നിന്ന് അദ്ദേഹത്തെ സസ്പെന്‍ഡ് ചെയ്തത്. ഈ സര്‍ക്കാരിനെ ഒരു പുകമറയ്ക്കുള്ളില്‍ നിര്‍ത്തുക എന്നത് ചില മാധ്യമങ്ങളുടേയും പ്രതിപക്ഷത്തിന്റേയും ലക്ഷ്യമാണ്. സര്‍ക്കാര്‍ പുകമറയ്ക്കുള്ളിലാണ് എന്ന ആത്മസംതൃപ്തി പ്രതിപക്ഷത്തിന് കിട്ടും. അതിനപ്പുറം ഒന്നും സംഭവിക്കില്ല. കള്ളക്കടത്ത് നടത്തിയവരെ ആരെങ്കിലും ചോദ്യം ചെയ്തിട്ടുണ്ടോ. ദേശീയ ഏജന്‍സികള്‍ ദുബായില്‍ പോയിട്ട് പ്രധാന പ്രതിയെ കാണാന്‍ പോലും പറ്റിയില്ല. രാഷ്ട്രീയ ലക്ഷ്യങ്ങള്‍ക്ക് വേണ്ടി കുറേ ആരോപണങ്ങള്‍ ഉന്നയിക്കുന്നു. സ്വര്‍ണക്കടത്തിന്റെ പ്രഭവ കേന്ദ്രം ഏതാണെന്ന് കണ്ടെത്താന്‍ പോലും സാധിക്കാത്ത ഏജന്‍സികളാണ് അന്വേഷണം നടത്തുന്നതെന്നും കാനം പറഞ്ഞു. മന്ത്രി പറഞ്ഞിട്ടല്ല ഖുറാന്‍ കൊണ്ടുവന്നത്. ഇറക്കുമതിയുടെ ഉത്തരവാദിത്തം മന്ത്രിയുടെ തലയില്‍ കെട്ടിവെക്കരുത്. കേന്ദ്ര ഏജന്‍സികളെ മോദി സര്‍ക്കാര്‍ രാഷ്ട്രീയ ലക്ഷ്യങ്ങള്‍ വേണ്ടിയാണ് ഉപയോഗിക്കുന്നത്. കേരളത്തില്‍ ഇടതുപക്ഷത്തിനെതിരെ ആണെങ്കില്‍ മറ്റു സംസ്ഥാനങ്ങളില്‍ ഇത് കോണ്‍ഗ്രസിനെതിരെയാണെന്നും കാനം കൂട്ടിച്ചേര്‍ത്തു.