പി.സി.ആർ. ടെസ്റ്റ് നടത്തണം ; എയർഇന്ത്യ

യു.എ.ഇ.യിലേക്ക് മടങ്ങിയെത്താനിരിക്കുന്നവർ കോവിഡ് പി.സി.ആർ. പരിശോധന തന്നെ നടത്തണമെന്ന് എയർ ഇന്ത്യ എക്സ്പ്രസ് അധികൃതർ ഓർമിപ്പിച്ചു. ട്രൂനാറ്റ്, സി.ബി. നാറ്റ് കോവിഡ് പരിശോധനകൾ നിലവിൽ അംഗീകരിക്കില്ല. മൂക്കിൽനിന്നോ തൊണ്ടയിൽനിന്നോ എടുക്കുന്ന സ്രവം ആർ.ടി. പി.സി.ആർ സംവിധാനത്തിലൂടെ പരിശോധന നടത്തി കോവിഡ് ഇല്ലെന്ന് തെളിയിക്കുന്ന സർട്ടിഫിക്കറ്റാണ് വേണ്ടതെന്നും കമ്പനി വ്യാഴാഴ്ച പുറത്തിറക്കിയ അറിയിപ്പിൽ പറയുന്നു. 96 മണിക്കൂറിനിടെയുള്ള പരിശോധനാഫലമാണ് വേണ്ടത്. സ്രവം അല്ലെങ്കിൽ സാംപിൾ ശേഖരിക്കുന്ന സമയം മുതലാണ് ഈ സമയപരിധി കണക്കാക്കുന്നത്. ഐ.സി.എം.ആർ., പ്യുവർ ഹെൽത്ത്, മൈക്രോ ഹെൽത്ത് എന്നീ ഏജൻസികളിൽ ഏതെങ്കിലും ഒന്നിന്റെ അംഗീകാരമുള്ള ലബോറട്ടറികളിലായിരിക്കണം പരിശോധന നടത്തേണ്ടത്. ലബോറട്ടറിയുടെ ഒറിജിനൽ ലെറ്റർ ഹെഡിൽ ഇംഗീഷിലുള്ള ഫലമാണ് വേണ്ടത്. ഒപ്പും സീലും ഉണ്ടാവണം. കൈകൊണ്ട് എഴുതിയ ഫലങ്ങളോ തിരുത്തലുകളുള്ളതോ സ്വീകരിക്കില്ല. ഫോട്ടോകോപ്പിയും അനുവദിക്കില്ലെന്നും എയർ ഇന്ത്യ എക്സ്പ്രസ് അറിയിച്ചു.