കര്‍ഷക പ്രതിഷേധം തെരുവില്‍

കര്‍ഷകദ്രോഹ ബില്ലുകള്‍ക്കെതിരെ കര്‍ഷകരുടെ പ്രതിഷേധം കശക്തമാവുന്നു.പഞ്ചാബില്‍ കര്‍ഷകര്‍ റെയില്‍പാളങ്ങള്‍ ഉപരോധിച്ചുകൊണ്ടിരിക്കുയാണ്. അമൃതസറിലും ഫിറോസ്പുരിലും കര്‍ഷകര്‍ റെയില്‍വേ ലൈനുകളില്‍ കുത്തിയിരുന്നുമാണ് പ്രതിഷേധിക്കുന്നത്. സമരത്തിന്റെ പശ്ചാത്തലത്തില്‍ സെപ്റ്റംബര്‍ 27 വരെ പല ട്രെയിന്‍ സര്‍വീസുകളും പഞ്ചാബില്‍ റദ്ദാക്കി. മൂന്ന് ദിവസം ട്രെയിന്‍ തടയുമെന്നാണ് പ്രഖ്യാപനം. അഖിലേന്ത്യാ കിസാന്‍സംഘര്‍ഷ് കോ--ഓര്‍ഡിനേഷന്‍ കമ്മിറ്റി ആഹ്വാനംചെയ്ത പ്രതിഷേധദിനാചരണത്തിന് 10 കേന്ദ്ര ട്രേഡ് യൂണിയന്‍ പിന്തുണ പ്രഖ്യാപിച്ചു. അഞ്ച് ഇടതുപാര്‍ടിയുടെ പിന്തുണയും ഐക്യദാര്‍ഢ്യവും ഉണ്ട്. ഹരിയാന, പഞ്ചാബ്, ഉത്തര്‍പ്രദേശ് സംസ്ഥാനങ്ങളില്‍ കര്‍ഷകസംഘടനകള്‍ ബന്ദിന് ആഹ്വാനം നല്‍കി. തെരുവുകളില്‍ പ്രതിഷേധസമരം തുടരുന്ന ഉത്തരേന്ത്യന്‍ കര്‍ഷകരെ നേരില്‍ക്കണ്ട് പിന്തുണ അറിയിച്ച് സിപിഐ എം എംപിമാര്‍. രാജ്യസഭാ നേതാവ് എളമരം കരീം, രാജ്യസഭാംഗങ്ങളായ കെ കെ രാഗേഷ്, ബികാസ് രഞ്ജന്‍ ഭട്ടാചാര്യ എന്നിവരും കിസാന്‍ സഭ ജോയിന്റ് സെക്രട്ടറിവിജൂ കൃഷ്ണനും വ്യാഴാഴ്ച ഹരിയാനയിലെ വിവിധ സമരകേന്ദ്രങ്ങള്‍ സന്ദര്‍ശിച്ചിരുന്നു. ഹരിയാനയിലെ പരുത്തി കൃഷി കേന്ദ്രങ്ങളായ ഉച്ചാന, ആദംപ്പുര്‍, നര്‍നോദ്, ബര്‍വാല എന്നിവിടങ്ങളില്‍ സമരത്തിലുള്ള കര്‍ഷകരെയാണ് സന്ദര്‍ശിച്ചത്. രാജ്യസഭയില്‍ ബില്ലുകള്‍ക്കെതിരെ ശക്തമായ നിലപാട് എടുത്തതിന്റെ പേരില്‍ സഭയില്‍ സസ്‌പെന്‍ഡ് ചെയ്യപ്പെട്ട എംപിമാരെ സമര കേന്ദ്രങ്ങളില്‍ കര്‍ഷകര്‍ ആവേശത്തോടെ സ്വീകരിച്ചു. ബില്ലുകള്‍ പിന്‍വലിക്കുംവരെ സമരം തുടരുമെന്ന് കര്‍ഷകര്‍ ഒറ്റക്കെട്ടായി പ്രഖ്യാപിച്ചു. കാര്‍ഷികമേഖലകൂടി കോര്‍പറേറ്റുകള്‍ക്ക് തീറെഴുതാനാണ് മോഡി സര്‍ക്കാര്‍ തിടുക്കത്തില്‍ ബില്ലുകല്‍ പാസാക്കിയതെന്ന് എളമരം കരീമും കെ കെ രാഗേഷും പറഞ്ഞു. മാപ്പുപറഞ്ഞാല്‍ സസ്‌പെന്‍ഷന്‍ പിന്‍വലിക്കാമെന്നാണ് സര്‍ക്കാര്‍ പറയുന്നത്. അധികാരികള്‍ക്ക് മുന്നില്‍ മാപ്പുപറച്ചില്‍ സംഘപരിവാരത്തിന്റെ ശീലമാണ്. എന്തെല്ലാം നടപടി നേരിടേണ്ടിവന്നാലും കര്‍ഷകര്‍ക്കുവേണ്ടി നിലകൊള്ളുമെന്നും - എംപിമാര്‍ പറഞ്ഞു.