മോഷണ സംഘം പൊലീസ് പിടിയിലായി

മലപ്പുറം: മോഷണ സംഘം പൊലീസ് പിടിയിലായി. പ്രതികളില്‍ ഒരാള്‍ കൈയില്‍ അണിഞ്ഞിരുന്ന ചെയിന്‍ ആണ് കേസ് അന്വേഷണ്തതിന് നിര്‍ണ്ണായകമായത്. കോഴിക്കോട്, മലപ്പുറം ജില്ലകളില്‍ സ്ഥിരം മോഷണം നടത്തുന്ന സംഘമാണ് പിടിയിലായത്. മലപ്പുറം മീനടത്തൂരിലെ ഹാര്‍ഡ്വെയര്‍ കടയില്‍നിന്ന് മൂന്നുലക്ഷംരൂപ കവര്‍ന്ന് പങ്കിട്ടെടുത്ത സംഘത്തെയാണ് താനൂര്‍ പൊലീസ് അറസ്റ്റ് ചെയ്തത്.എടപ്പാള്‍ കരിങ്കല്ലത്താണി പൂക്കത്തയില്‍ ഷഫീഖ് (36), കല്‍പ്പകഞ്ചേരി കള്ളിയത്ത് ഫൈസല്‍ (42), നിറമരുതൂര്‍ പിലാത്തോട്ടത്തില്‍ യാക്കൂബ് (38), താനൂര്‍ ശോഭപ്പറമ്പ് ചോരാപ്പറമ്പ് അഭിലാഷ് (36) എന്നിവരാണ് അറസ്റ്റിലായത്. ജൂലായിലാണ് മീനടത്തൂരിലെ ഹാര്‍ഡ്വെയര്‍ വ്യപാരിയായ ഫൈസലിന്റെ കടയില്‍നിന്ന് 3,18,000 രൂപ കവര്‍ന്നത്. ഈമാസം 22-ന് കരിങ്കപ്പാറയിലെ വ്യാപാരി അബ്ദുലത്തീഫിന്റെ പലചരക്കുകടയിലും സംഘം മോഷണം നടത്തി. 2500 രൂപയാണ് മോഷ്ടിച്ചത്. കവര്‍ച്ചയില്‍ സിസിടിവി കേന്ദ്രീകരിച്ച് അന്വേഷിക്കുന്നതിനിടെ പ്രതികളിലൊരാളായ യാക്കൂബ് ധരിച്ച കൈച്ചെയിന്‍  ശ്രദ്ധയില്‍പ്പെട്ടതാണ് അന്വേഷണത്തില്‍ നിര്‍ണായകമായത്. ഇതോടെയാണ് മറ്റുപ്രതികളെയും വലയിലാക്കാന്‍ കഴിഞ്ഞത്. ഇവര്‍ക്കെതിരേ താനൂരിലും മഞ്ചേരിയിലും കോഴിക്കോട് ടൗണ്‍ സ്റ്റേഷനിലും കേസുകളുണ്ട്. ഇരുപത്തഞ്ചോളം മോഷണക്കേസുകള്‍ ഇവരുടെ പേരിലുണ്ടെന്നാണ് പൊലീസ് വ്യക്തമാക്കി. സംഘം ഉപയോഗിച്ച വാഹനങ്ങളും ആയുധങ്ങളും പൊലീസ് കസ്റ്റഡിയിലെടുത്തു.