ജെഡിയുവും ബിജെപിയും പകുതി വീതം സീറ്റുകളിൽ

മഹാസഖ്യത്തിന് പിന്നാലെ സീറ്റ് വിഭജനത്തിൽ ജെഡിയുവും ബിജെപിയും ധാരണയിലെത്തി. ബിഹാർ തിരഞ്ഞെടുപ്പിൽ പകുതി വീതം സീറ്റുകളിൽ മൽസരിക്കാനാണ് ജനതാദൾ യുണൈറ്റഡും ബിജെപിയും ധാരണയിലെത്തിയിരിക്കുന്നത്.. 243 സീറ്റുകളിൽ ജെഡിയു 122ലും ബിജെപി 121 സീറ്റുകളിലും മൽസരിക്കുമെന്ന് ദേശീയമാധ്യമങ്ങൾ റിപ്പോർട്ട് ചെയ്തു. ഔദ്യോഗിക പ്രഖ്യാപനം ഉടനുണ്ടാകും.

നിതീഷ് കുമാറിനൊപ്പം ജീതൻ റാം മാഞ്ചിയുടെ ഹിന്ദുസ്ഥാനി അവാം മോർച്ചയുമുണ്ടായും ജെഡിയുവിന്റെ സീറ്റുകളിൽനിന്നാണ് മാഞ്ചിയുടെ പാർട്ടിക്കു ടിക്കറ്റ് നൽകുക. റാം വിലാസ് പസ്വാന്റെ ലോക് ജനശക്തി പാർട്ടിക്കുള്ള (എൽജെപി) സീറ്റുകൾ ബിജെപിയുടെ വിഹിതത്തിൽനിന്നു നൽകും.

എൽജെപി നേതാവ് ചിരാഗ് പസ്വാനും നിതീഷ് കുമാറും തമ്മിൽ കടുത്ത വാഗ്വാദം നടന്നിരുന്നു. ഇതേത്തുടർന്ന് എൽജെപി സഖ്യത്തിൽനിന്നു പുറത്തുപോകുമെന്ന റിപ്പോർട്ടുകൾക്കിടയിലാണ് ജെഡിയുവും ബിജെപിയും തമ്മിൽ സീറ്റ് ധാരണയുണ്ടായിരിക്കുന്നത്.  ഒക്ടോബർ 28, നവംബർ 3, 7 തീയതികളിലാണ് ബിഹാർ തിരഞ്ഞെടുപ്പ്. ഫലം നവംബർ 10ന് വരും.

പ്രതിപക്ഷ പാർട്ടികളുടെ മഹാസഖ്യത്തെ ആർജെഡി നേതാവ് തേജസ്വി യാദവാണ് നയിക്കുന്നത്. തേജസ്വിയാണ് പ്രതിപക്ഷ സഖ്യത്തിന്റെ മുഖ്യമന്ത്രി സ്ഥാനാർഥിയും. ആകെയുള്ള 243 സീറ്റിൽ 144 എണ്ണത്തിൽ ആർജെഡിയാണു മത്സരിക്കുക. ബാക്കി സീറ്റുകൾ സഖ്യത്തിലെ മറ്റുപാർട്ടികൾക്കാണ്. കോൺഗ്രസ് 70, ഇടതു പാർട്ടികൾ 29 എന്നിങ്ങനെയാണു നിലവിലെ സീറ്റുധാരണ.