സൗദിയിൽ കോവിഡ് കുറവ്

സൗദിയിൽ കോവിഡ് 19 സ്ഥിരീകരിച്ചവരുടെ പ്രതിദിന കണക്കിൽ കുറവ് രേഖപ്പെടുത്തി. പുതുതായി 390 പേർക്ക് രോഗം സ്ഥിരീകരിച്ചതായി ആരോഗ്യ മന്ത്രാലയം അറിയിച്ചു. നിരവധി മാസങ്ങൾക്കിടെ ഇത്രയും കുറവ് ആളുകൾക്ക് രോഗം സ്ഥിരീകരിക്കുന്നത് ഇതാദ്യമായാണ്. ആകെ രോഗം ബാധിച്ചവർ 321485 ഉം മരണസംഖ്യ 4875 ഉം ആയി. 10027 പേർ ചികിത്സയിൽ കഴിയുന്നതിൽ 955 പേരുടെ നില ഗുരുതരമായി തുടരുന്നതായും അദ്ദേഹം പറഞ്ഞു. 

ഇന്നത്തെ രോഗമുക്തി നിരക്ക് 95.56 ശതമാനമാണ്. കൂടുതൽ ജാഗ്രത കൈകൊണ്ടാൽ കൂടുതൽ നേട്ടങ്ങൾ കൈവരിക്കാമെന്ന് ആരോഗ്യ മന്ത്രാലയം വക്താവ് പറഞ്ഞു. അണുബാധയിൽ നിന്ന് സാധാരണയിൽ വീണ്ടെടുക്കാൻ 10 ദിവസം വേണ്ടിവരുന്നുണ്ട്. ഇതിൽ അവസാന മൂന്നു ദിവസം രോഗലക്ഷണങ്ങളൊന്നും കാണുന്നില്ല. രോഗമുക്തി നേടിയവരിൽ ഉത്പാദിപ്പിക്കപ്പെടുന്ന ആന്റിബോഡിക്ക് ഉറപ്പ് നൽകാനാകില്ല. അവരും പ്രതിരോധ-മുൻകരുതൽ നടപടികൾ സ്വീകരിക്കണം. 

പൊതു നിരത്തിലും പാർക്കിലും നടക്കാനിറങ്ങുന്നവർ ചുറ്റുമുള്ളവരുടെ സംരക്ഷണം ഉറപ്പു വരുത്തുന്നതിന് മാസ്ക് ഉൾപ്പടെയുള്ള സുരക്ഷാ മാനദണ്ഡങ്ങൾ നിർബന്ധമായും പാലിക്കേണ്ടതുണ്ട്. പ്രോട്ടോക്കോൾ ലംഘിച്ച് നടത്തുന്ന ഒത്തു ചേരലുകളിൽ നിന്ന് പകർച്ചവ്യാധി പകരുന്നതായി റിപ്പോർട്ടുണ്ട്.