കാസര്‍ഗോട്ടെ രണ്ടര കോടിയുടെ ചന്ദനക്കടത്ത് കേസില്‍ വല വമ്പമാരുടെയും നിക്ഷേപം നടത്തിയതായി സൂചന

ജില്ലാ കലക്ടറുടെ ക്യാമ്പ് ഓഫീസിന് സമീപത്തു നിന്ന് രണ്ടര കോടി രൂപ വിലവരുന്ന 855 കിലോ ചന്ദനമുട്ടികള്‍ പിടികൂടിയ സംഭവത്തില്‍ കൂടുതല്‍ പേര്‍ പ്രതികളാവും. ചന്ദനക്കടത്തുമായി ബന്ധപ്പെട്ട് നാലു പേര്‍ പണം നിക്ഷേപിച്ചതായി വനംവകുപ്പിന് വിവരം ലഭിച്ചിട്ടുണ്ട്. ഇവരെ ഉടന്‍ പിടികൂടി ചോദ്യം ചെയ്‌തേക്കും. തായല്‍ നായന്മാര്‍മൂലയിലെ ഒന്നാം പ്രതി ഇ അബ്ദുല്‍ ഖാദര്‍, മകന്‍ ഇബ്രാഹിം അര്‍ഷാദ്, ലോറി ഡ്രൈവര്‍ എന്നിവരാണ് നിലവില്‍ കേസിലെ പ്രതികള്‍. ഇനി പിടികൂടാനുള്ളതു വമ്പന്‍ സ്രാവുകളാണെന്ന സൂചനയാണ് വനംവകുപ്പ് നല്‍കുന്നത്. ചന്ദനക്കടത്തിനു പിന്നില്‍ വലിയൊരു ശൃഖല തന്നെയുണ്ടെന്ന നിഗമനത്തിലാണ് വനംവകുപ്പ്. നിലവില്‍ പിടികൂടിയവരെ ചോദ്യം ചെയ്ത് ഇവരിലേക്ക് എത്താനുള്ള ശ്രമം അന്വേഷണ ഉദ്യോഗസ്ഥര്‍ ആരംഭിച്ചിട്ടുണ്ട്. അതേ സമയം അന്വേഷണ സംഘത്തെ വിപൂലീകരിക്കുന്ന കാര്യവും പരിഗണിക്കുന്നു.
കാസര്‍ഗോഡ് സിവില്‍ സ്റ്റേഷനടുത്ത് ജില്ലാ പൊലീസ് മേധാവി, കലക്ടര്‍ എന്നിവരുടെ ഔദ്യോഗിക വസതിക്കു 100 മീറ്റര്‍ അകലെയുള്ള തായല്‍ നായന്മാര്‍മൂലയിലെ അബ്ദുല്‍ ഖാദറിന്റെ വീട്ടില്‍ നിന്നാണ് കലക്ടര്‍ ഡി സജിത്ത് ബാബുവിന്റെ നേതൃത്വത്തില്‍ ചന്ദനമുട്ടികളും വാഹനങ്ങളും പിടികൂടി വനം വകുപ്പിനു കൈമാറിയത്. രണ്ടര കോടി വിലമതിക്കുന്നതാണ് പിടികൂടിയ ചന്ദനമുട്ടികള്‍. സംസ്ഥാനത്തെ ഏറ്റവും വലിയ ചന്ദനവേട്ടയാണിത്.