ഒന്ന് അനുഭവിക്കേണ്ടതാണ് കുറുവ ദ്വീപിലേ ജിവിതം

വയനാട് ജില്ലയിലെ മറ്റൊരു പ്രധാന വിനോദ സഞ്ചാര കേന്ദ്രമാണ് കുറുവ ദ്വീപ്. ഈ ദ്വീപിന്റെ സൗന്ദര്യം ആസ്വദിക്കാന്‍ നിരവധി സഞ്ചാരികള്‍ ഇവിടെ എത്താറുണ്ട്.മനുഷ്യന്‍ ഇതുവരെയും ആവാസം ഉറപ്പിക്കാത്ത ഇന്ത്യയിലെ ഏറ്റവും വലിയ ഏക ദ്വീപ്. അങ്ങനെയും ഒരു വിശേഷണത്തിന് അര്‍ഹമാണ് കുറുവ ദ്വീപ്.മുളകള്‍ കൂട്ടിക്കെട്ടിയുണ്ടാക്കുന്ന ചങ്ങാടങ്ങളില്‍ പുഴയിലൂടൊരു യാത്രയാണ് ഇവിടത്തെ പ്രധാന ആകര്‍ഷണം.തൊള്ളായിരം ഏക്കറില്‍ ദ്വീപും ദ്വീപിനുള്ളില്‍ അനേകം ദ്വീപുകളും ഉപദ്വീപുകളുമായി നില്‍ക്കുകയാണ് കുറുവ.
വയനാട് ജില്ലയില്‍ കബനി പുഴയുടെ നടുവിലുള്ള ഒരു കൂട്ടം തുരുത്തുകള്‍ കൂടി ചേര്‍ന്ന ഇടമാണ് കുറുവ ദ്വീപെന്നും പറയാം.വേഴാമ്പലുകള്‍, തത്തകള്‍, വിവിധ തരം ചിത്രശലഭങ്ങള്‍ എന്നിവയുടെ ആവാസമേഖലയാണിത്. കേരള ടൂറിസം ഡവലപ്പ്മെന്റ് കോര്‍പ്പറേഷന്‍ (കെറ്റിഡിസി) നല്‍കുന്ന ഫൈബര്‍ ബോട്ടുകളിലും റാഫ്റ്റിലും സഞ്ചാരികള്‍ക്ക് കുറുവ ദ്വീപിലെത്താം.ഫോറസ്റ്റ് ഡിപ്പാര്‍ട്ട്മെന്റിന്റെയും കെറ്റിഡിസിയുടെയും മുന്‍കൂര്‍ അനുവാദത്തോടെ മാത്രമേ ഇവിടേക്ക് യാത്രചെയ്യാന്‍ പാടുള്ളൂ. ഇവിടെ വന്യജീവികളുടെ സങ്കേതം കൂടിയാണ്.കാട്ടുപോത്തുകളും കടുവയും കാട്ടാനകളുമൊക്കെ ഇടക്കിടെ ഇവിടേക്ക് നീന്തിക്കയറും. സഞ്ചാരികള്‍ക്ക് മറ്റൊരു അനുഭവമാണ് കുറുവ സമ്മാനിക്കുന്നത്.