ജിഎസ്ടി നഷ്ടം: 20 സംസ്ഥാനങ്ങള്‍ വായ്പ വാങ്ങും

കൊവിഡ് പശ്ചാത്തലത്തിലുണ്ടായ ജിഎസ്ടി വരുമാന നഷ്ടം നികത്താന്‍ 68,825 കോടി രൂപ പൊതുവിപണിയില്‍ നിന്നു വായ്പയെടുക്കാന്‍ 20 സംസ്ഥാനങ്ങള്‍ക്ക് കേന്ദ്ര സര്‍ക്കാര്‍ അനുമതി നല്‍കി. വരുമാനനഷ്ടം നികത്താന്‍ സംസ്ഥാനങ്ങള്‍ വായ്പയെടുക്കുകയെന്ന കേന്ദ്ര ധനമന്ത്രാലയത്തിന്റെ നിലപാടിനെ പിന്തുണയ്ക്കുന്നവയാണ് ഈ സംസ്ഥാനങ്ങള്‍.എന്നാല്‍, കേരളം അടക്കം പ്രതിപക്ഷ കക്ഷികള്‍ ഭരിക്കുന്ന സംസ്ഥാനങ്ങള്‍ കേന്ദ്ര സര്‍ക്കാര്‍ വായ്പയെടുത്തു നല്‍കണമെന്ന നിലപാടിലാണ്. ജിഎസ്ടി വരുമാന നഷ്ടം നികത്തുന്നതു സംബന്ധിച്ചുള്ള തര്‍ക്കം തീര്‍ക്കാന്‍ വിളിച്ചു ചേര്‍ത്ത മൂന്നു ജിഎസ്ടി കൗണ്‍സില്‍ യോഗങ്ങളും തര്‍ക്കത്തില്‍ തീരുമാനമാവാതെ പിരിഞ്ഞിരുന്നു. പൊതുധാരണയ്ക്കുള്ള ശ്രമങ്ങള്‍ എങ്ങുമെത്താതെ നില്‍ക്കുമ്പോഴാണ് കേന്ദ്രത്തെ അനുകൂലിച്ച 20 സംസ്ഥാനങ്ങള്‍ക്ക് അഡീഷനല്‍ വായ്പയെടുക്കാനുള്ള അനുമതി ധനമന്ത്രാലയത്തിലെ എക്‌സ്‌പെന്‍ഡിച്ചര്‍ ഡിപ്പാര്‍ട്ട്‌മെന്റ് നല്‍കിയിരിക്കുന്നത്.
ആന്ധ്രപ്രദേശ്, അരുണാചല്‍ പ്രദേശ്, അസം, ബിഹാര്‍, ഗോവ, ഗുജറാത്ത്, ഹരിയാന, ഹിമാചല്‍ പ്രദേശ്, കര്‍ണാടക, മധ്യപ്രദേശ്, മഹാരാഷ്ട്ര, മണിപ്പുര്‍, മേഘാലയ, മിസോറാം, നാഗാലാന്‍ഡ്, ഒഡിശ, സിക്കിം, ത്രിപുര, ഉത്തര്‍പ്രദേശ്, ഉത്തരാഖണ്ഡ് എന്നിവയാണ് ഈ സംസ്ഥാനങ്ങള്‍. കേന്ദ്രം വായ്പയെടുത്തു നല്‍കണമെന്ന് ആവശ്യപ്പെടുന്ന പ്രതിപക്ഷ നിലപാടിന് ഒപ്പമായിരുന്നു മഹാരാഷ്ട്ര നിന്നിരുന്നത്. പ്രതിപക്ഷം ഒന്നിച്ചുനിന്ന് ഇക്കാര്യത്തില്‍ കേന്ദ്രത്തിനെതിരേ പൊരുതണമെന്നും ഉദ്ധവ് താക്കറെ നിര്‍ദേശിച്ചിരുന്നതാണ്. എന്നാല്‍, അവസാനഘട്ടത്തില്‍ കേന്ദ്ര നിലപാടിനു മഹാരാഷ്ട്ര വഴങ്ങുകയായിരുന്നു. കേന്ദ്രം നല്‍കിയ രണ്ട് ഓപ്ഷനുകളില്‍ ആദ്യത്തേത് (യഥാര്‍ഥ നഷ്ടത്തിനു തുല്യമായ തുക വായ്പയെടുക്കുക) 'മനസില്ലാ മനസോടെ' സ്വീകരിക്കുകയാണെന്നാണ് മുഖ്യമന്ത്രി കേന്ദ്ര സര്‍ക്കാരിനെ അറിയിച്ചത്.
കഴിഞ്ഞ ദിവസത്തെ ജിഎസ്ടി കൗണ്‍സില്‍ യോഗത്തില്‍ മഹാരാഷ്ട്ര ധനമന്ത്രി പങ്കെടുത്തിരുന്നില്ല. മഹാരാഷ്ട്ര കാലുമാറിയതായി തോന്നുന്നുവെന്ന് കേരള ധനമന്ത്രി ഡോ. തോമസ് ഐസക് ചൂണ്ടിക്കാണിച്ചിരുന്നു. സംസ്ഥാനങ്ങള്‍ക്കിടയില്‍ വിവേചനം കാണിക്കുന്ന കേന്ദ്ര നടപടിക്കെതിരേ സുപ്രീം കോടതിയെ സമീപിക്കുമെന്നും തോമസ് ഐസക് വ്യക്തമാക്കിയിട്ടുണ്ട്.