പശ്ചാത്തലത്തില്‍ ചുവപ്പ് പൂശി, പച്ച രണ്ടില കൊഴിഞ്ഞു, മാണി വന്നു

മുന്നണി മാറ്റത്തോടൊപ്പം പാര്‍ട്ടിയെ അടിമുടി ചുവപ്പിലേയ്ക്ക് മാറ്റാന്‍ കേരള കോണ്‍ഗ്രസ് എം. പച്ച നിറത്തിലുള്ള രണ്ടില പാര്‍ട്ടി ആസ്ഥാനത്തിന് നിന്ന് കൊഴിഞ്ഞു വീണു. ബോര്‍ഡില്‍ ഉണ്ടായിരുന്ന രണ്ടില ചിഹ്നം മാറ്റി മാണിയുടെ ചിത്രം വെച്ചു. ഒപ്പം, പശ്ചാത്തലത്തില്‍ ചുവന്ന ചായവും പൂശി. ജോസ് പക്ഷത്തിന്റെ നേതൃയോഗം അവസാനിച്ചതിനു പിന്നാലെ ഇടതുമുന്നണി പ്രവേശനത്തിനു മുന്‍പ് തന്നെ ബോര്‍ഡില്‍ മാറ്റം വരുത്തിയിരുന്നു.
പാലായിലെ ജോസ് കെ മാണിയുടെ വസതിയില്‍ ചേര്‍ന്ന പാര്‍ലമെന്ററി പാര്‍ട്ടി യോഗത്തിന് ശേഷമാണ് മുന്നണി പ്രവേശനം ജോസ് കെ മാണി പ്രഖ്യാപിച്ചത്. തോമസ് ചാഴിക്കാടന്‍, റോഷി അഗസ്റ്റിന്‍, എന്‍ ജയരാജ് എന്നിവര്‍ യോഗത്തില്‍ പങ്കെടുത്തിരുന്നു.യുഡിഎഫിനെ രൂക്ഷമായ ഭാഷയില്‍ വിമര്‍ശിച്ചുകൊണ്ടാണ് ജോസ് കെ മാണി ആരംഭിച്ചത്. ആത്മാഭിമാനം അടിയറവ് വച്ച് മുന്നോട്ടുപോകാന്‍ കഴിയില്ലെന്നും ജോസ് കെ മാണി പറഞ്ഞു.യുഡിഎഫില്‍ നിന്ന് കേരള കോണ്‍ഗ്രസ് പാര്‍ട്ടിയെ പുറത്താക്കിയിട്ട് മൂന്ന് മാസമായെന്നും, തങ്ങളെ തിരിച്ചുകൊണ്ടുവരാന്‍ ഒരു ചര്‍ച്ചയും നടന്നില്ലെന്നും ജോസ്.കെ.മാണി പറഞ്ഞു. പ്രതിപക്ഷം ഭരണപക്ഷത്തിനെതിരെ അവിശ്വാസ പ്രമേയം കൊണ്ടുവന്നപ്പോള്‍ തങ്ങളുടെ എംഎല്‍എമാരുമായി ബന്ധപ്പെട്ടില്ലെന്നും ജോസ് കെ മാണി പറഞ്ഞു. കേരള കോണ്‍ഗ്രസിനെ തകര്‍ക്കാനുള്ള അജണ്ഡയാണ് നടന്നതെന്നും ജോസ് കെ മാണി ആരോപിച്ചു.