പാര്‍ട്ടിക്ക് നൂറ് നായകന് 97

ഇന്ത്യന്‍ കമ്മ്യൂണിസ്റ്റ് പാര്‍ട്ടി നൂറിന്റെ നിറവില്‍ നില്‍ക്കുമ്പോള്‍, ജനനായകനെന്ന് എതിരാളികള്‍ പോലും സമ്മതിക്കുന്ന വി.എസ്. അച്യുതാനന്ദന് ഇന്ന് 97 വയസ് .
വി.എസ് എന്ന സമരനായകനെ വാര്‍ത്തെടുത്തത് സമരങ്ങളുടെ തീച്ചൂളയിലെ അഗ്‌നിനാളങ്ങളായിരുന്നു. തിരുവിതാംകൂറില്‍ അമേരിക്കന്‍ മോഡല്‍ ഭരണരീതി കൊണ്ടുവരാനുള്ള സി.പി.രാമസ്വാമി അയ്യരുടെ ശ്രമത്തെ അതിശക്തമായി എതിര്‍ത്ത വി.എസിനെ 1946 ഒക്ടോബര്‍ 28 ന് പൊലീസ് അറസ്റ്റ് ചെയ്ത് പൂഞ്ഞാര്‍ ലോക്കപ്പിലടച്ചു. കൊടിയ മര്‍ദ്ദനമായിരുന്നു. പാദത്തില്‍ ബയണറ്റു കുത്തിയിറക്കി. അഞ്ചര വര്‍ഷം ജയിലില്‍. നാലര വര്‍ഷം ഒളിവ് ജീവിതം. വി.എസിനെ അത് കൂടുതല്‍ കരുത്തനാക്കുകയായിരുന്നു.1964ല്‍ സി.പി.ഐ ദേശീയ കൗണ്‍സിലില്‍ നിന്ന് ഇറങ്ങിവന്ന 32 പേര്‍ രൂപം കൊടുത്ത സി.പി.എമ്മിന്റെ ജീവിച്ചിരിക്കുന്ന ഏക സഖാവാണ് അദ്ദേഹം.
ശാരീരിക അവശതകള്‍ നിമിത്തം പൊതുവേദികളില്‍ നിന്ന് വി.എസ് വിട്ടുനില്‍ക്കുകയാണ്.

ശാരീരിക ബുദ്ധിമുട്ടുകള്‍ കാരണം ഔദ്യോഗിക വസതിക്കു പുറത്തേക്കു ഇറങ്ങിയിട്ട് തന്നെ ഒരു വര്‍ഷമാകുന്നു. കഴിഞ്ഞ ഒക്ടോബറില്‍ തലച്ചോറിലുണ്ടായ രക്തസ്രാവത്തെത്തുടര്‍ന്ന് വിഎസിനു പൂര്‍ണ വിശ്രമമാണു ഡോക്ടര്‍മാര്‍ നിര്‍ദേശിച്ചിരിക്കുന്നത്.
സാധാരണ വി എസിന്റെ പിറന്നാളിന് ആഘോഷങ്ങള്‍ ലളിതമാണെങ്കിലും ജന്മദിനാശംസ നേരാന്‍ വലിയൊരു നിരയാണ് എത്താറുണ്ട് . എന്നാല്‍ ഇക്കുറി കൊവിഡ് പശ്ചാത്തലത്തില്‍ അതെല്ലാം ഒഴിവാക്കിയിരിക്കുകയാണ്.