എന്‍ ജി ഒ അസോസിയേഷനില്‍ ‘എ’ ഗ്രൂപ്പില്‍ പൊട്ടിത്തെറി

യോഗത്തില്‍ അടി

എന്‍ജിഒ അസോസിയേഷന്‍ സംസ്ഥാന ട്രഷറര്‍ തസ്തികയിലേയ്ക്ക് ഭാരവാഹിയെ കണ്ടെത്തുന്നതിനുള്ള മുന്നോടിയായി നടന്ന ഗ്രൂപ്പ് യോഗത്തില്‍ കൂട്ടയടി. എന്‍ജിഒ അസോസിയേഷന്‍ സംസ്ഥാന ട്രഷറര്‍ തസ്തിക എ ഗ്രൂപ്പിന് അനുവദിച്ചിട്ടുള്ളതാണ്. ട്രഷറര്‍ തസ്തിക വഹിച്ചിരുന്ന പി. ഉണ്ണികൃഷ്ണന്‍ ഗസറ്റഡ് തസ്തികയിലേയ്ക്ക് പ്രൊമോഷന്‍ ലഭിച്ചപ്പോള്‍ ഉണ്ടായ ഒഴിവ് നികത്തുന്നതിന് കൂടിയ യോഗത്തിലാണ് അടി ഉണ്ടായത്. എ ഗ്രൂപ്പിന്റെ നേതാക്കളായ ഉമ്മന്‍ ചാണ്ടിയും തമ്പാനൂര്‍ രവിയും നിശ്ചയിച്ച ആളെ വെട്ടി സംസ്ഥാന പ്രസിഡന്റ് അവതരിപ്പിച്ച ആളെ ട്രഷാര്‍ ആക്കിയതിനെ ചൊല്ലിയാണ് ബഹളവും അടിപിടിയും ഉണ്ടായത്. ഇന്ന് ഉച്ചയോടെയായിരുന്നു സംഭവം. സംസ്ഥാന സമിതി ചേരുന്നതിന് മുന്‍പ് കളമശ്ശേരി റെസ്റ്റ് ഹൗസില്‍ കൂടിയ എ ഗ്രൂപ്പ് യോഗത്തിലായിരുന്നു ബഹളം. നിലവിലെ വൈസ്പ്രസിഡന്റായ ജാഫര്‍ ഖാനെ ട്രഷാറാര്‍ ആക്കാനായിരുന്നു മുതിര്‍ന്ന നേതാക്കള്‍ ഉള്‍പ്പടെ തീരുമാനിച്ചിരുന്നത്. ഇതിനായിരുന്നു സമിതിയിലെ അംഗങ്ങളില്‍ ഭൂരിപക്ഷത്തിനും സമ്മതം. ഇതു വകവയ്ക്കാതെ രാജശേഖരന്‍ നായരുടെ പേര് പ്രസിഡന്റ് നിശ്ചയിക്കുകയും അതിന് എല്ലാവരും വഴങ്ങണമെന്ന് നിര്‍ദേശിക്കുകയും ചെയ്തതാണ് ബഹളത്തിലേയ്ക്ക് നീങ്ങിയത്. 12ന് എന്‍ജിഒ അസോസിയേഷന്‍ ജില്ലാ ഓഫിസില്‍ ചേര്‍ന്ന യോഗത്തിലും ഇതിന്റെ പ്രതിഫലനം ഉണ്ടെയെങ്കിലും പ്രസിഡന്റ് പിടിച്ചടം ഒടിച്ചുകൊണ്ട് തന്റെ തീരുമാനം പ്രഖ്യാപിച്ച് യോഗം പിരിച്ചു വിടുകയായിരുന്നു. സംസ്ഥാന പ്രസിഡന്റ് ഒരു പ്രശ്‌നവും ഉണ്ടായില്ലന്ന് പറയുമ്പോഴും ബഹളത്തിന്റെയും ഉന്തും തള്ളിന്റെയും വീഡിയോയും പുറത്ത് വന്നിരിക്കുകയാണ്.