ജനവാസ മേഖലയില്‍ കടുവകള്‍ ഇറങ്ങി; ഭീതിയോടെ ജനങ്ങള്‍

വയനാട് സുല്‍ത്താന്‍ ബത്തേരിയിലെ ജനവാസ മേഖലയില്‍ കടുവകള്‍ ഇറങ്ങി. ബീനാച്ചി പൂതിക്കാടാണ് കടുവകളിറങ്ങിയത്. ബീനാച്ചി സ്വദേശിയായ ഉമ്മയുടെ പറമ്പിലാണ് കടുവകളെ കണ്ടത്. കടുവ ഇറങ്ങിയതറിഞ്ഞു വനം വകുപ്പും, പൊലീസും സ്ഥലത്തെത്തിയിട്ടുണ്ട്. എത്രയും വേഗത്തില്‍ കൂടി സ്ഥാപിച്ചു കടുവകളെ പിടികൂടണമെന്നാണ് ആവശ്യം ഉയരുന്നത്. വനം വകുപ്പ് പ്രദേശത്ത് തെരച്ചില്‍ നടത്തുകയാണ്. ആളുകള്‍ പുറത്തിറങ്ങരുതെന്ന് നിര്‍ദേശം നല്‍കിയിട്ടുണ്ട്.
കഴിഞ്ഞ കുറച്ചു ദിവസമായി പ്രദേശത്ത് കടുവയുടെ ശല്യമുണ്ടായിരുന്നുവെന്ന് നാട്ടുകാര്‍ പറയുന്നു. നാട്ടുകാര്‍ തന്നെയാണ് കടുവയെ കണ്ട കാര്യം ഫോറസ്റ്റ് ഓഫീസര്‍മാരെ അറിയിച്ചത്. രണ്ട് ചെറിയ കടുവകളും തള്ളക്കടുവയുമാണ് നാട്ടിലിറങ്ങിയതെന്ന് ഫോറസ്റ്റ് ഉദ്യോഗസ്ഥര്‍ പറഞ്ഞു.
കഴിഞ്ഞ ആഴ്ച വയനാട്ടില്‍ നിന്ന് നെയ്യാറിലെത്തിച്ച കടുവ ചാടിപ്പോയതും ഏറെ ആശങ്കയുണ്ടാക്കിയിരുന്നു. സഫാരി പാര്‍ക്കിലെ കൂട്ടില്‍ നിന്നാണ് കടുവ രക്ഷപ്പെട്ടത്. അടുത്ത ദിവസം മയക്കുവെടി വച്ചാണ് കടുവയെ പിടികൂടിയത്.