സ്വപ്ന സുരേഷിന് ഭക്തി കൂടി, ജീവിതം ഇപ്പോള്‍ അടിമുടി മാറി

ഇട്ടുമൂടാന്‍ പണവും സ്വര്‍ണവും ഉന്നതങ്ങളില്‍ സ്വാധീനം, ഉയര്‍ന്ന ഉദ്യോഗസ്ഥരുമായി അടുത്ത സൗഹൃദം, ആരായാലും ഈ സ്വപ്നജീവിതം കാണുമ്പോള്‍ ഒന്ന് കൊതിക്കും. എന്നാല്‍ ഉപ്പു തിന്നവന്‍ വെള്ളം കുടിക്കുമെന്ന പഴഞ്ചൊല്ലുപോലെ തന്നെയായി മാറിയിരിക്കുകയാണ് സ്വപ്ന സുരേഷിന്റെ കാര്യവും. വെട്ടിച്ചും ചതിച്ചും സ്വന്തമാക്കിയതെല്ലാം ഒരു നിമിഷം കൊണ്ട് നഷ്ടമായി. ഒരു മഹാറാണിയെപ്പോലെ ജീവിച്ച സ്വപ്ന സുരേഷിന്റെ ജീവിതം ഇപ്പോള്‍ അടിമുടി മാറിയിട്ടുണ്ട്. ഭക്തിയും ഒന്ന് കൂടി. ഇപ്പോള്‍ ദിവസവും ഏറെനേരം ജയില്‍ വളപ്പിലെ മുരുക ക്ഷേത്രത്തിന് സമീപമാണ് സ്വപ്ന സമയം ചെലവഴിക്കുന്നത്. മുടങ്ങാതെ രാവിലെയും വൈകിട്ടും പ്രാര്‍ത്ഥിക്കും. ജയിലിലേക്കെത്തിയ ആദ്യനാളുകളില്‍ അതീവ ദുഖിതയായിരുന്ന സ്വപ്ന കൗണ്‍സിലിംഗിന് വിധേയയായ ശേഷം വളരെയധികം മാറിപ്പോയെന്നാണ് ജയിലധികൃതര്‍ പറയുന്നത്.
മറ്റ് തടവുകാര്‍ക്ക് ആഴ്ചയില്‍ മൂന്ന് ദിവസം വീട്ടിലേക്ക് വിളിക്കാന്‍ അനുമതിയുള്ളപ്പോള്‍ വി ഐ പിമാര്‍ക്ക് ഐ ഫോണുകള്‍ സമ്മാനിച്ച സ്വപ്നയ്ക്ക് വീട്ടിലേക്ക് വിളിക്കണേല്‍ ഉദ്യോഗസ്ഥര്‍ കനിയണം. അതും ആഴ്ചയില്‍ ഒരു തവണ മാത്രം. അമ്മ, മക്കള്‍, ഭര്‍ത്താവ് എന്നിവരെ വിളിക്കാന്‍ മാത്രമേ അനുമതിയുള്ളുവെങ്കിലും അതിനുപോലും ഉദ്യോഗസ്ഥരുടെ സാന്നിധ്യം കൂടിയേ തീരൂ. കോഫെപോസ വകുപ്പില്‍പ്പെടുത്തിയതിയിരിക്കുന്നതിനാലാണ് സ്വപ്നയ്ക്ക് ഫോണ്‍വിളിയില്‍ നിയന്ത്രണമുള്ളത്.അടുത്ത ബന്ധുക്കള്‍ക്ക് ആഴ്ചയില്‍ ഒരു ദിവസം സ്വപ്നയെ കാണാനുമാകും. ഇങ്ങനെ മാത്രമല്ല സ്വപ്ന മാറിയത്.ഭക്ഷണകാര്യങ്ങളിലും ഒരു ചിട്ട കൊണ്ടുവന്നിരിക്കുകയാണ് സ്വപ്ന. തനിക്ക് വെജിറ്റേറിയന്‍ ആഹാരങ്ങള്‍ മതിയെന്നാണ് സ്വപ്ന ഉദ്യോഗസ്ഥരോട് പറഞ്ഞിരിക്കുന്നത്. അതേസമയം കോടികള്‍ കൊണ്ട് അമ്മാനമാടിയ സ്വപ്നയുടെ കയ്യില്‍ ഇന്നുള്ളത് വീട്ടില്‍ നിന്ന് മണിയോഡറായി കിട്ടിയ 1000 രൂപയാണ്. ഈ പൈസയ്ക്ക് ജയിലിലെ കാന്റീനില്‍ നിന്നും സ്വപ്നയ്ക്ക് ലഘുഭക്ഷണം വാങ്ങികഴിക്കാം.അതിന് ഉദ്യോഗസ്ഥര്‍ അനുമതി നല്‍കിയിട്ടുണ്ട്.