മാവോയിസ്റ്റായാല്‍ മരിച്ചു വീഴേണ്ടവരാണെന്ന നിലപാട് സര്‍ക്കാരിനില്ലെന്ന് മുഖ്യമന്ത്രി

മാവോയിസ്റ്റായാല്‍ മരിച്ചുവീഴേണ്ടവരാണെന്ന നിലപാട് സര്‍ക്കാരിനില്ലെന്ന് മുഖ്യമന്ത്രി. വയനാട്ടില്‍ തണ്ടര്‍ബോള്‍ട്ടുമായുള്ള ഏറ്റുമുള്ളലില്‍ മാവോയിസ്റ്റ് വേല്‍മുരുകന്‍ കൊല്ലപ്പെട്ട സംഭവത്തെക്കുറിച്ച് മാധ്യമ പ്രവര്‍ത്തകരുടെ ചോദ്യത്തിന് മറുപടി പറയുകയായിരുന്നു മുഖ്യമന്ത്രി.മാവോയിസ്റ്റുകളാണ് പൊലീസുകാര്‍ക്ക് നേരെ വെടിയുതിര്‍ത്തത്. പൊലീസ് ആത്മ രക്ഷാര്‍ത്ഥമാണ് തിരിച്ച് വെടിയുതിര്‍ത്തത്. പൊലീസിന്റെ ഭാഗത്ത് നിന്ന് ആള്‍നാശമോ പരുക്കോ ഉണ്ടായിട്ടില്ലെന്നും മുഖ്യമന്ത്രി വാര്‍ത്താ സമ്മേളനത്തില്‍ വ്യക്തമാക്കി. മാവോയിസ്റ്റ് പ്രവര്‍ത്തനങ്ങളെ കുറിച്ച് ഇന്റലിജന്‍സ് റിപ്പോര്‍ട്ട് ലഭിച്ച സാഹചര്യത്തില്‍ വടക്കന്‍ ജില്ലകളില്‍ പൊലീസ് നിരീക്ഷണം ശക്തമാക്കിയിരുന്നു. ഇതിന്റെ ഭാഗമായാണ് തണ്ടര്‍ ബോര്‍ട്ട് സംഘം നിരീക്ഷണം നടത്തിയത്. തുടര്‍ന്ന് ഇരു കൂട്ടരും തമ്മില്‍ സംഘര്‍ഷമുണ്ടായി.
അല്‍പ സമയത്തെ ഏറ്റുമുട്ടലിന് ശേഷം മാവേയിസ്റ്റ് സംഘം സംഭവ സ്ഥലത്ത് നിന്ന് രക്ഷപെട്ടു. ശേഷം നടത്തിയ പരിശോധനയിലാണ് യുണിഫോം ധരിച്ച ഒരാള്‍ മരിച്ച് കിടക്കുന്നത് കാണുന്നത്. മരിച്ച മാവോയിസ്റ്റിന്റെ കൈവശം 303 റൈഫിളുമുണ്ടായിരുന്നു. ആയുധ ധാരികളായ അഞ്ചിലധികം പേരാണ് സംഘത്തിലുണ്ടായിരുന്നതെന്നാണ് റിപ്പോര്‍ട്ട്. ഏതെങ്കിലും തരത്തില്‍ ആളെ കൊലപ്പെടുത്തുക എന്ന ഉദ്ദേശത്തോടെ നടത്തിയ ഒരു കാര്യമല്ല ഇതെന്നും മുഖ്യമന്ത്രി വാര്‍ത്താ സമ്മേളനത്തില്‍ പറഞ്ഞു.