കടുത്തുരുത്തി പോയി പൂഞ്ഞാറും ,ജോസഫ് പക്ഷത്ത് പൊട്ടിത്തെറി

തദ്ദേശ തിരഞ്ഞെടുപ്പില്‍ കോട്ടയം ജില്ലാ പഞ്ചായത്തിലെ സീറ്റ് ധാരണ കഴിഞ്ഞപ്പോള്‍ കേരളകോണ്‍ഗ്രസ് ജോസഫ് ഗ്രൂപ്പില്‍ കലാപം. സീറ്റ് മോഹിച്ച് മറുപക്ഷത്തുനിന്ന് എത്തിയ പലര്‍കകും മത്‌സരിക്കാന്‍ ഇടമില്ലാത്തതാണ് പ്രശ്‌നങ്ങള്‍ക്ക് കാരണം.
ജോസഫിന് ഒന്‍പത് സീറ്റുകള്‍ നല്‍കാന്‍ ധാരണ. നിലവില്‍ പിജെ ജോസഫും സംഘവും ഉണ്ടാക്കിയിരിക്കുന്ന ധാരണ അനുസരിച്ച് കടുത്തുരുത്തി പൂഞ്ഞാര്‍ സീറ്റുകള്‍ വേണ്ടന്ന് വയ്ക്കാനാണ്. എന്നാല്‍ പാരമ്പര്യ കേരള കോണ്‍ഗ്രസ് സീറ്റുകള്‍ വേണ്ടന്ന് വച്ചുള്ള കളിയില്‍ മാണി ഗ്രൂപ്പില്‍ നിന്ന് എത്തിയ യുവജന നേതാക്കള്‍ കടുത്ത പ്രതിഷേധത്തിലാണ്.
ജില്ലാ പ്രസിഡന്റിന് സജി മഞ്ഞകടമ്പന്‍ പൂഞ്ഞാറില്‍ നിന്ന് ജില്ലാ പഞ്ചായത്തിലേക്ക് മല്‍സരിക്കാന്‍ തയാറെടുത്തിരിക്കുകയായിരുന്നു. അതിനാണ് തിരിച്ചടി വന്നിരിക്കുന്നത്. ഏറ്റുമാനൂരും, കടുത്തുരുത്തിയിലും ഇതേ സ്ഥിതിയാണ്. പലരും തങ്ങളുടെ വിയോജിപ്പ് അറിയിച്ചു കഴിഞ്ഞു.
കഴിഞ്ഞ തവണ കേരള കോണ്‍ഗ്രസ് ഒന്നായിരുന്നപ്പോള്‍ 11 സീറ്റിലാണ് അവര്‍ മത്സരിച്ചത്. ഇത്രയും സീറ്റ് തന്നെ വേണമെന്ന് ജോസഫ് ഇത്തവണയും ആവശ്യപ്പെട്ടിരുന്നു. എന്നാല്‍ കഴിഞ്ഞ തവണ വിജയിച്ച ആറ് എണ്ണം നല്‍കാമെന്ന് കോണ്‍ഗ്രസ് അറിയിച്ചു. 13 സീറ്റുകളില്‍ കോണ്‍ഗ്രസ്സും മത്സരിക്കുമെന്നാണ് പറയുന്നത്. പക്ഷെ ഒരു സീറ്റ് ലീഗിന് വിട്ടു നല്‍കാന്‍ സാധ്യതയുണ്ട്. അത് ഏതെന്ന കാര്യത്തില്‍ അടുത്ത ദിവസമേ ധാരണയുണ്ടാകൂ. കഴിഞ്ഞ ദിവസങ്ങളില്‍ യുഡിഎഫ് കണ്‍വീനര്‍ എംഎം ഹസന്റെ നേതൃത്വത്തില്‍ നേതാക്കള്‍ ചര്‍ച്ച നടത്തിയിരുന്നു.

വൈക്കം. വെള്ളൂര്‍. കുറവിലങ്ങാട്, ഭരണങ്ങാനം, കാഞ്ഞിരപ്പള്ളി, കങ്ങഴ .തൃക്കൊടിത്താനം, കിടങ്ങൂര്‍ , അതിരമ്പുഴ ഡിവിഷനുകളിലാണ് ജോസഫ് വിഭാഗം മത്സരിക്കുന്നത്.

പിളര്‍പ്പിന് മുമ്പുള്ള കേരള കോണ്‍ഗ്രസ് മത്സരിച്ച അത്രയും സീറ്റുകള്‍ ഇനി തരാന്‍ കഴിയില്ലെന്നായിരുന്നു കോണ്‍ഗ്രസ് നിലപാട്. ജയിച്ച സീറ്റുകള്‍ എന്ന കണക്ക് പ്രകാരം ആറ് സീറ്റേ കിട്ടൂ. അത് അംഗീകരിക്കാന്‍ ജോസഫ് തയ്യാറയില്ല. കുറഞ്ഞത് 10 സീറ്റെങ്കിലും കിട്ടണം എന്നതായിരുന്നു ആവശ്യം. ഒടുവില്‍ ഒമ്പത് സീറ്റില്‍ ധാരണയായി.