കെ.കെ. ഷാജിക്കെതിരായ വധശ്രമം:പ്രതികള്‍ റിമാന്ററില്‍

എലിയറമല സംരക്ഷണ സമിതി വൈസ് ചെയര്‍മാനും ബിജെപി പ്രവര്‍ത്തകനുമായ കെ.കെ. ഷാജിയെ വെട്ടിക്കൊലപ്പെടുത്താന്‍ ശ്രമിച്ച കേസില്‍ പോപ്പുലര്‍ ഫ്രണ്ട് ജില്ലാ നേതാക്കളായ രണ്ടു പേര്‍ കൂടി റിമാന്റില്‍പോപ്പുലര്‍ ജില്ലാ കമ്മറ്റിയംഗവും സിറ്റി ഡിവിഷന്‍ സെക്രട്ടറിയുമായ എലത്തൂര്‍ വടക്കരകത്ത് ഹനീഫ (38), എസ്ഡിടിയു മെമ്പര്‍ പുതിയങ്ങാടി ചാലില്‍മന്ദം കണ്ടിപറമ്പില്‍ ഷബീര്‍ അലി (37) എന്നിവരെയാണ് ജുഡീഷ്യല്‍ ഫസ്റ്റ് ക്ലാസ് മജിസ്ട്രേറ്റ് കോടതി- ഒന്ന്, 14 ദിവസത്തേക്ക് റിമാന്റ് ചെയ്തത്. ഇരുവരും ഇന്നലെ കോടതിയില്‍ കീഴടങ്ങുകയായിരുന്നു. ഇതോടെ കേസില്‍ പിടിയിലായവരുടെ എണ്ണം നാലായി. കേസിലെ മറ്റുപ്രതികളായ മായനാട് സ്വദേശി അബ്ദുള്ള, പൂവ്വാട്ടുപറമ്പ് സ്വദേശി അബ്ദുള്‍ അസീസ് എന്നിവരെ നേരത്തെ അറസ്റ്റുചെയ്തിരുന്നു. മറ്റൊരാള്‍ വിദേശത്തേക്ക് കടന്നതായാണ് പൊലീസിന് ലഭിച്ച വിവരം. ഇയാളെ നാട്ടിലെത്തിക്കാനുള്ള ശ്രമം പൊലീസ് ആരംഭിച്ചു. അക്രമത്തില്‍ നേരിട്ട് പങ്കെടുത്ത ആനക്കുഴിക്കര കിഴക്കേ മായിങ്ങോട്ട് അന്‍സാറും ഒളിവിലാണ്. ഇയാള്‍ക്കെതിരെ ലുക്ക്ഔട്ട് നോട്ടീസ് പുറപ്പെടുവിച്ചിട്ടുണ്ട്.പലതവണ കോടതിയില്‍ മുന്‍കൂര്‍ ജാമ്യത്തിനായി ശ്രമിച്ചെങ്കിലും പൊലീസിന്റെ വാദം അംഗീകരിച്ച് വിവിധ കോടതികള്‍ ജാമ്യം തള്ളുകയായിരുന്നു.