ഇഡിയുടെ കഥയില്‍ കാര്യംതേടിഅന്വേഷണ ഏജന്‍സികള്‍

സ്വര്‍ണകടത്ത കേസില്‍ ഇഡി കോടതിയില്‍ പറഞ്ഞ കാര്യങ്ങളില്‍ അവരില്‍ നിന്ന് തന്നെ തെളിവ് ശേഖരിക്കാന്‍ ഒരുങ്ങുകയാണ് കേസ് അന്വേഷിക്കുന്ന മറ്റ് ഏജന്‍സികള്‍.
പ്രതികള്‍ പറഞ്ഞ മൊഴികള്‍ക്ക് അപ്പുറം ആധികാരികമായ എന്തെങ്കിലും വിവരങ്ങള്‍ കേസുമായി ബന്ധപ്പെട്ട് ലഭിച്ചിട്ടുണ്ടോ എന്നാണ് ഇവര്‍ പരിശോധിക്കുന്നത്. അടുത്ത രണ്ട് ദിവസങ്ങള്‍ക്കുള്ളില്‍ കസ്റ്റംസും എന്‍ ഐ എ യും ഇക്കാര്യത്തില്‍ വ്യക്തത വരുത്തും.

എം ശിവശങ്കറാണ് കള്ളക്കടത്തിന്റെ സൂത്രധാരനെന്ന വെളിപ്പെടുത്തലുമായി എന്‍ഫോഴ്‌സ്‌മെന്റ് ഡയറക്ടറേറ്റ് രംഗത്തുവന്നതിന്റെ തെളിവാണ് തേടുന്നത്. മാസങ്ങള്‍ പിന്നിട്ടിട്ടും ദേശീയ അന്വേഷണ ഏജന്‍സിയുടെയും കസ്റ്റംസിന്റെയും അന്വേഷണത്തില്‍ ഇത്തരമൊരു സൂചന പോലും ലഭ്യമായിട്ടില്ല. ഇതിനിടെയാണ് ഇഡി അത്തരമൊരു നിഗമനത്തിലേക്ക് എത്തിയത്. ഇതിന്റെ അടിസ്ഥാനമായ തെളിവ് ലഭിച്ചില്ലങ്കില്‍ എല്ലാ കേസുകളും കോടതിയ നിലതില്‍ക്കില്ലന്ന് ഉദ്യോഗസ്ഥര്‍ പറയുന്നു.

കള്ളക്കടത്തിന്റെ സൂത്രധാരനെന്ന് ഇഡി പറയുന്ന എം ശിവശങ്കര്‍ എന്‍ഐഎ രജിസ്റ്റര്‍ ചെയ്ത കേസില്‍ ഇതുവരെ പ്രതിയല്ല. 35 പേരെയാണ് സ്വര്‍ണക്കള്ളക്കടത്തു കേസില്‍ എന്‍ഐഎ പ്രതി ചേര്‍ത്തിട്ടുള്ളത്. യുഇഎ കേന്ദ്രീകരിച്ചു പ്രവര്‍ത്തിക്കുന്ന ഫൈസല്‍ ഫരീദ് ആണ് സ്വര്‍ണക്കടത്തിന്റെ സൂത്രധാരന്‍ എന്ന് എന്‍ഐഎ കണ്ടെത്തിയത്.

ശിവശങ്കറിനെ ഇതുവരെ സ്വര്‍ണക്കടത്തുമായി ബന്ധപ്പെടുത്താനായിട്ടില്ലെന്നാണ് എന്‍ഐഎ ഉദ്യോഗസ്ഥര്‍ പറയുന്നത്. യുഎപിഎ ചുമത്തിയ ഭീകരവാദ കേസുകളാണ് എന്‍ഐഎ അന്വേഷിക്കുന്നത്. അതില്‍ ശിവശങ്കറിനെതിരെ ഇതുവരെ തെളിവൊന്നും ലഭിച്ചിട്ടില്ല. തെളിവില്ലാതെ ഭീകരവാദ കേസില്‍ ഒരാളെ പ്രതി ചേര്‍ക്കാനാവില്ല.

സ്വപ്നയുടെ ലോക്കറില്‍ കണ്ടെത്തിയ പണം സ്വര്‍ണക്കടത്തിലൂടെ ലഭിച്ചതാണെന്നാണ് എന്‍ഐഎ കോടതിയില്‍ നല്‍കിയ റിപ്പോര്‍ട്ടില്‍ പറയുന്നത്. എന്നാല്‍ ഇത് ലൈഫ് മിഷന്‍ കരാര്‍ നല്‍കിയതിലെ കമ്മിഷന്‍ ആണെന്നാണ് ഇഡി കോടതിയില്‍ വാദിച്ചത്. ഈ പണം ശിവശങ്കറിനുള്ളതാണെന്നും ഇഡിക്കു വേണ്ടി അഡീഷനല്‍ സോളിസിറ്റര്‍ ജനറല്‍ എസ് വി രാജു കോടതിയില്‍ പറഞ്ഞു. എന്‍ഐഎ അന്വേഷണത്തില്‍ കണ്ടെത്തിയ കാര്യങ്ങള്‍ക്കു വിരുദ്ധമാണ് ഇത്. ഇതിന്റെ തെളിവും എന്‍ ഐ എ സംഘം തേടുന്നുണ്ട്.

കെടി റമീസ് ആണ് സ്വര്‍ണക്കടത്തിന്റെ സൂത്രധാരന്‍ എന്ന നിഗമനത്തിലാണ് കസ്റ്റംസ്. അതേസമയം സ്വര്‍ണം അടങ്ങിയ ബാഗേജ് വിട്ടുകിട്ടാന്‍ ശിവശങ്കര്‍ കസ്റ്റംസ് ഉദ്യോഗസ്ഥനെ വിളിച്ചെന്ന ഇഡിയുടെ വെളിപ്പെടുത്തല്‍ കസ്റ്റംസ് അംഗീകരിച്ചില്ല. കസ്റ്റംസ് ഇതുവരെ ഇത്തരമൊരു വാദം ഉന്നയിച്ചിട്ടില്ല. വളരെ എളുപ്പത്തില്‍ കണ്ടെത്താമായിരുന്ന ഇക്കാര്യം കസ്റ്റംസിന് കിട്ടാതെ എങ്ങനെ ഇഡിക്ക് കിട്ടി എന്നതാണ് കൗതുകം.