വികസന പദ്ധതികളുമായി മുന്നോട്ടു പോകും

സര്‍ക്കാര്‍ പദ്ധതികള്‍ അട്ടിമറിക്കാനുള്ള പ്രതിപക്ഷ നീക്കത്തിനെതിരെ കര്‍ശന നടപടികളുമായി ഭരണപക്ഷം രഗത്തുവരുമെന്ന് ഇന്നലെ ഹെഡ് ലൈന്‍ കേരള റിപ്പോര്‍ട്ട് ചെയ്തിരുന്നു.
അത് ശരിവച്ചുകൊണ്ട് മുഖ്യമന്ത്രി പിണറായി വിജയന്‍ തന്നെ സര്‍ക്കാര്‍ ഉദ്യോഗസ്ഥര്‍ക്ക് പൂര്‍ണ പിന്‍തുണയുമായി രംഗത്ത് എത്തി.
സ്വര്‍ണകടത്ത് അന്വേഷണത്തില്‍ ഏജന്‍സികള്‍ക്ക് എല്ലാ പിന്‍തുണയും നല്‍കിയ മുഖ്യമന്ത്രിയാണ് ഏജന്‍സികളുടെ പുതിയ നീക്കത്തിനെതിരെ ആഞ്ഞടിച്ചിരിക്കുന്നത്.
ഇന്ത്യ രാജ്യത്തെ അന്വേഷണ ഏജന്‍സികള്‍ ഇവിടെ വട്ടം ഇട്ട് പറക്കുന്നതെന്തിനാണെന്ന് വാര്‍ത്താസമ്മേളനത്തില്‍ ചോദിച്ച മുഖ്യമന്ത്രി കുത്തകകളുടെ വക്കാലത്ത് എടുത്തു ഇങ്ങോട്ട് വരേണ്ടെന്ന താക്കീതും നല്‍കി.
സര്‍ക്കാര്‍ പദ്ധതികള്‍ നടപ്പാക്കുന്ന ഉദ്യോഗസ്ഥരെ ചോദ്യം ചെയ്യുന്നതെന്തിനാണ്. ചിലര്‍ക്ക് ഉള്ള നിക്ഷിപ്ത താല്പര്യം കേന്ദ്ര അന്വേഷണ ഏജന്‍സികള്‍ക്ക് എങ്ങനെ വരുമെന്നും മുഖ്യമന്ത്രി ചോദിച്ചു. വികല മനസുകള്‍ക്ക് അനുസരിച്ചു തുള്ളി കളിക്കുന്നതായി അന്വേഷണ ഏജന്‍സികള്‍ മാറരുതെന്നും അല്‍പ മനസുകളുടെ കൂടെ അല്ല അന്വേഷണ ഏജന്‍സികള്‍ നില്‍ക്കേണ്ടതും പറഞ്ഞ മുഖ്യമന്ത്രി ജനങ്ങള്‍ ഏല്‍പ്പിച്ച ഉത്തരവാദിത്വം നിറവേറ്റുമെന്നും കൂട്ടിച്ചേര്‍ത്തു.