കൂരോപ്പടയില്‍ സ്ഥാനാര്‍ഥി നിര്‍ണയം കോണ്‍ഗ്രസില്‍ പൊട്ടിത്തെറി

250ഓളം കോണ്‍ഗ്രസ് പ്രവര്‍ത്തകര്‍ കൂട്ടരാജിവെച്ചു

കോട്ടയം ജില്ലയിലെ പുതുപ്പള്ളി നിയോജക മണ്ഡലത്തിലെ കൂരോപ്പട പഞ്ചായത്തില്‍ 250 ഓളം കോണ്‍ഗ്രസ് പ്രവര്‍ത്തകര്‍ രാജിവച്ചു. സ്ഥാനാര്‍ഥി നിര്‍ണയത്തിലെ അപാകതകളെ തുടര്‍ന്നാണ് കൂരോപ്പടയിലെ കോണ്‍ഗ്രസ് പ്രവര്‍ത്തകര്‍ ഡിസിസി നേതൃത്വത്തിനുരാജി സമര്‍പ്പിച്ചത്.
കോണ്‍ഗ്രസിന്റെ മണ്ഡലം പ്രസിഡന്റായ സാബു സി കുര്യന്‍ സ്ഥാനാര്‍ഥി നിര്‍ണയത്തില്‍ ഏകാധിപത്യ പ്രവണതയാണ് കാണിക്കുന്നതെന്ന് കോണ്‍ഗ്രസ് പ്രവര്‍ത്തകര്‍ കുറ്റപ്പെടുത്തി. സ്ഥാനാര്‍ത്ഥിയെ കൂട്ടായ തീരുമാനത്തിലൂടെ നിശ്ചയിക്കുകയും ഡിസിസി നേതൃത്വത്തിന് ലിസ്റ്റ് കൊടുക്കുമ്പോള്‍ പഴയ ലിസ്റ്റ് മാറ്റി പുതിയ ലിസ്റ്റ് കൊടുത്ത് പ്രവര്‍ത്തകരെ കബളിപ്പിക്കുകയുമാണ് ചെയ്തതെന്ന് കോണ്‍ഗ്രസ് പ്രവര്‍ത്തകര്‍ കൂരോപ്പട വാര്‍ത്തകള്‍ ടീമിനോട് പറഞ്ഞു.
മുന്‍ മണ്ഡലം പ്രസിഡണ്ട് ഒ.സി.ജേക്കബ്ബ്, കുഞ്ഞ് പുതുശേരി, യൂത്ത് കോണ്‍ഗ്രസ് ജില്ലാ സെക്രട്ടറി ബിബിന്‍ ഇലഞ്ഞിത്തറ തുടങ്ങിയ കോണ്‍ഗ്രസ് നേതാക്കളുടെ നേതൃത്വത്തില്‍ ചേര്‍ന്ന യോഗത്തിലാണ് കൂരോപ്പട പഞ്ചായത്തിലേക്ക് സ്വതന്ത്ര സ്ഥാനാര്‍ത്ഥികളെ മത്സരിപ്പിക്കാന്‍ തീരുമാനിച്ചത്. ബ്ലോക്കിലേക്ക് കൂരോപ്പട വാര്‍ഡിലും ,കോത്തല വാര്‍ഡിലും സ്ഥാനാര്‍ഥികളെ മത്സരിപ്പിക്കുവാനും തീരുമാനിച്ചിട്ടുണ്ട്.