ഇഡിയുടെ വാദം സ്വര്‍ണകടത്തില്‍ എതിരാകും : കോടതി

സ്വപ്ന സുരേഷിന്റെ ബാങ്ക് ലോക്കറില്‍നിന്ന് എന്‍ഐഎ പിടിച്ചെടുത്ത പണം ലൈഫ് മിഷന്‍ കരാറുകാരന്‍ നല്‍കിയ കമീഷനാണെന്ന ഇഡി വാദത്തില്‍ കൂടുതല്‍ അന്വേഷണം വേണമെന്ന് കോടതി.
ഇഡിയുടെ വാദം, സ്വര്‍ണക്കടത്ത് കേസിലെ കള്ളപ്പണ ഇടപാട് സംബന്ധിച്ച് ഇഡി രജിസ്റ്റര്‍ ചെയ്ത് അന്വേഷിക്കുന്ന കേസിന് എതിരാകുമെന്ന് കോടതി വിധിന്യായത്തില്‍ പറഞ്ഞു. അതിനാല്‍ പത്തിന് ഇഡിക്ക് സ്വപ്ന നല്‍കിയ മൊഴി സൂക്ഷ്മമായി പരിശോധിച്ച് അന്വേഷിക്കണമെന്ന് കോടതി വ്യക്തമാക്കി.
എം ശിവശങ്കറിന്റെ ജാമ്യാപേക്ഷ തള്ളിക്കൊണ്ടുള്ള വിധിയിലാണ് എറണാകുളം പ്രിന്‍സിപ്പല്‍ സെഷന്‍സ് കോടതിയുടെ പരാമര്‍ശം.
ലോക്കറില്‍നിന്ന് എന്‍ഐഎ പിടിച്ചെടുത്ത പണം സ്വര്‍ണക്കടത്തില്‍നിന്നുള്ള പ്രതിഫലമോ ലൈഫ് മിഷനിലെ കമീഷനോ എന്ന കാര്യത്തില്‍ കൂടുതല്‍ അന്വേഷണം വേണം. ഇഡിയുടെ വാദത്തില്‍ വൈരുധ്യമുണ്ടെന്നും ജഡ്ജി ഡോ. കൗസര്‍ എടപ്പഗത്ത് പറഞ്ഞു.

ലോക്കറില്‍നിന്ന് കിട്ടിയ പണം ലൈഫ് മിഷന്‍ കരാറുകാരനില്‍നിന്ന് ശിവശങ്കറിന് ലഭിച്ചതെന്നാണ് പുതിയ വാദം, ഇത് സ്വപ്ന സുരേഷ് നല്‍കിയ മൊഴിയുടെ അടിസ്ഥാനത്തിലെന്നാണ് ഇഡി അവതരിപ്പിച്ചത്. അതുവരെ പറഞ്ഞത് ഇത് സ്വര്‍ണക്കടത്തിലൂടെ സ്വപ്ന സമ്പാദിച്ച പണമെന്നാണ്.

ലോക്കറിലെ പണത്തിന്റെ സ്രോതസും ശിവശങ്കറിന്റെ പങ്കും അതിലൂടെയേ തീരുമാനിക്കാനാകൂ. സ്വപ്ന നേരത്തെ നല്‍കിയ മൊഴികളിലൊന്നും ലോക്കറിലുണ്ടായിരുന്ന പണം ലൈഫ് മിഷനിലെ കമീഷനായി ശിവശങ്കറിനു ലഭിച്ചതാണെന്ന് പറഞ്ഞിട്ടില്ല.

അവര്‍ക്ക് കമീഷന്‍ കിട്ടിയതായി പറഞ്ഞിട്ടുണ്ടെങ്കിലും ശിവശങ്കറിനെ അതുമായി ബന്ധിപ്പിച്ചിട്ടുമില്ല. പുതിയ മൊഴി അതിനെല്ലാം വിരുദ്ധമാണ്. എന്നാല്‍ ഇഡിയുടെ വാദത്തിലുള്ള വൈരുദ്ധ്യം ശിവശങ്കറിന് ജാമ്യം നല്‍കാനുള്ള കാരണമായി കണക്കാക്കാനാകില്ലെന്നും അന്വേഷണം നിര്‍ണായക ഘട്ടത്തിലാണെന്നും കോടതി പറഞ്ഞു.