കസ്റ്റംസിനെ വിളിച്ചെന്ന് ഇഡി , ഖേകള്‍ തന്നിട്ടില്ലന്ന് കോടതി

ശിവശങ്കര്‍ കസ്റ്റംസ് ഓഫീസറെ വിളിച്ചെന്ന് സമ്മതിച്ച മൊഴി കേസ് രേഖകളിലില്ലെന്ന് കോടതി. ജാമ്യാപേക്ഷയെ എതിര്‍ത്ത് ഇ.ഡി നടത്തിയ പ്രധാന വാദം ശിവശങ്കര്‍ ഇത്തരത്തില്‍ മൊഴി നല്‍കിയെന്നായിരുന്നു.

സ്വര്‍ണക്കടത്തിനെ കുറിച്ച് ശിവശങ്കറിന് അറിവുണ്ടായിരുന്നെന്നും ശിവശങ്കര്‍ കസ്റ്റംസ് ഉദ്യോഗസ്ഥരെ വിളിച്ചെന്നും സ്വപ്ന സുരേഷ് ഇ.ഡിക്ക് നല്‍കിയ മൊഴിയില്‍ പറയുന്നുണ്ട്. ഇതു സത്യമാണെങ്കില്‍ സ്വര്‍ണമടങ്ങിയ ബാഗുകള്‍ വിട്ടുകിട്ടാന്‍ ആണോ ശിവശങ്കര്‍ കസ്റ്റംസ് ഉദ്യോഗസ്ഥരെ വിളിച്ചതെന്ന് കണ്ടെത്താന്‍ തുടരന്വേഷണം വേണം. ഇതുവരെ ശിവശങ്കറിന്റെ പങ്ക് വെളിപ്പെടുത്താതിരുന്ന സ്വപ്ന ഇപ്പോള്‍ അക്കാര്യം വെളിപ്പെടുത്തുന്നതിനെ കുറിച്ച് പരിശോധിക്കണമെന്നുമാണ് ശിവശങ്കറിന്റെ ജാമ്യാപേക്ഷ തള്ളിയ 53 പേജുകളുള്ള വിധിന്യായത്തില്‍ കോടതി പറയുന്നത്.

ഇതിനെിതരെ കോടതിയില്‍ ശിവശങ്കറിന്റെ അഭിഭാഷകന്‍ രംഗത്തുവന്നിരുന്നു. 20l9 ഏപ്രിലില്‍ ശിവശങ്കര്‍ കസ്റ്റംസ് ഓഫീസറെ വിളിച്ചെന്ന് പറയുന്നു. എന്നാല്‍ എന്തു കൊണ്ട് കസ്റ്റംസ് ഓഫിസറുടെ പേര് എന്‍ഫോഴ്സ്മെന്റ് വെളിപ്പെടുത്തുന്നില്ല എന്നായിരുന്നു അഭിഭാഷകന്റെ ചോദ്യം. ആ സമയത്ത് കൊച്ചിയില്‍ ബാഗില്‍ എത്തിയത് ഭക്ഷ്യ വസ്തുക്കളാണ്. ശിവശങ്കര്‍ വിളിച്ചത് ഫുഡ് സേഫ്റ്റി കമ്മിഷണറെയാണെന്നും അഭിഭാഷകന്‍ വാദിച്ചു.

അനധികൃത വരുമാനം ലോക്കറില്‍ സൂക്ഷിക്കാന്‍ നിര്‍ദേശിച്ചത് ശിവശങ്കറെന്നത് സ്വപ്നയുടെ മൊഴി മാത്രമാണെന്നും അഭിഭാഷകന്‍ കോടതിയില്‍ വാദിച്ചു.

കളളക്കടത്തിന് ഗൂഢാലോചന തുടങ്ങുന്നത് 2019 ജൂണില്‍ മാത്രമാണ്. എന്നാല്‍ ലോക്കര്‍ തുറന്നത് 2018 ഓഗസ്റ്റിലാണെന്നും ശിവശങ്കറിന്റെ അഭിഭാഷകന്‍ കോടതിയില്‍ പറഞ്ഞു. ഇതിനെ എങ്ങനെ കളളക്കടത്തുമായി ബന്ധിപ്പിക്കാന്‍ കഴിയുമെന്നാണ് ചോദ്യം.