ശിവശങ്കറിന്റേയും സ്വപ്നയുടേയും വാട്ട്സ്ആപ്പ് ചാറ്റ് വിവരങ്ങള്‍ തേടി വിജിലന്‍സ്;

എന്‍ഐഎ കോടതിയെ സമീപിച്ചു

ലൈഫ് മിഷന്‍ ക്രമക്കേടുമായി ബന്ധപ്പെട്ട് അന്വേഷണത്തിന്റെ ഭാഗമായി പ്രതികളുടെ വാട്ട്സ്ആപ്പ് ചാറ്റിന്റെ വിവരങ്ങള്‍തേടി വിജിലന്‍സ്. മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കര്‍, സ്വര്‍ണ്ണക്കടത്ത് കേസ് പ്രതികളായ സ്വപ്ന സുരേഷ്, സന്ദീപ് നായര്‍ എന്നിവരുടെ വാട്ട്സ്ആപ്പ് ചാറ്റിന്റെ വിവരങ്ങളാണ് വിജിലന്‍സ് തേടുന്നത്. കേന്ദ്രഅന്വേഷണ ഏജന്‍സികള്‍ ശേഖരിച്ച വിവരങ്ങള്‍ തേടി വിജിലന്‍സ് എന്‍ഐഎ കോടതിയെ സമീപിക്കുകയായിരുന്നു.ശിവശങ്കര്‍ ചോദ്യം ചെയ്യലിനോട് സഹകരിക്കുന്നില്ലെന്നും അതിനാല്‍ ശേഖരിച്ച വാട്ട്സ്ആപ്പ് ചാറ്റുകള്‍ പരിശോധിക്കാന്‍ അനുമതി നല്‍കണമെന്നുമാണ് വിജിലന്‍സ് ആവശ്യപ്പെട്ടിരിക്കുന്നത്. കെ ഫോണ്‍, സ്മാര്‍ട്ട് സിറ്റി മുതലായവയുമായി ബന്ധപ്പെട്ട ഔദ്യോഗിക വിവരങ്ങള്‍ ശിവശങ്കര്‍ സ്വപ്നയ്ക്കും സരിത്തിനും കൈമാറിയതായി എന്‍ഫോഴ്സ്മെന്റ് ഡയറക്ടറേറ്റ് കണ്ടെത്തിയ പശ്ചാത്തലത്തിലാണ് ഡിജിറ്റല്‍ തെളിവുകള്‍ക്കായി വിജിലന്‍സ് കോടതിയെ സമീപിച്ചത്. സി ഡാക്കില്‍ നിന്നും വീണ്ടെടുത്ത തെളിവുകള്‍ പരിശോധിക്കാനാണ് വിജിലന്‍സ് അനുമതി തേടിയത്. കേസുമായി ബന്ധപ്പെട്ട് യിഇഒ യുവി ജോസിനെ കഴിഞ്ഞ ദിവസവും വിജിലന്‍സ് ചോദ്യം ചെയ്തിരുന്നു.