കണ്ണൂർ അഞ്ചരക്കണ്ടി കൊവിഡ് ട്രീറ്റ്‌മെന്റ് സെന്റര്‍ പ്രവര്‍ത്തനം നിര്‍ത്തി

കണ്ണൂർ : ജില്ലയിലെ കൊവിഡ് ചികിത്സയില്‍ മുഖ്യ പങ്ക് വഹിച്ച അഞ്ചരക്കണ്ടി കൊവിഡ് ഫസ്റ്റ്‌ലൈന്‍ ട്രീറ്റ്‌മെന്റ് സെന്റര്‍ പ്രവര്‍ത്തനം നിര്‍ത്തി. ഇവിടുത്തെ അവസാന രോഗി ഇരിട്ടി സ്വദേശിയായ അറുപത്തിയഞ്ചുകാരനും ഇന്നലെ മടങ്ങിയതോടെയാണ് കൊവിഡ് ട്രീറ്റ്‌മെന്റ് സെന്റര്‍ പ്രവര്‍ത്തനം നിര്‍ത്തിയത്.

കഴിഞ്ഞ മാര്‍ച്ച് 27 മുതലായിരുന്നു ജില്ലാ കലക്ടര്‍ ടി വി സുഭാഷിന്റെ നേതൃത്വത്തിലുള്ള ജില്ലാ ദുരന്ത നിവാരണ അതോറി അഞ്ചരക്കണ്ടി മെഡിക്കല്‍ കോളേജ് ഏറ്റെടുത്ത് പ്രത്യേക കൊവിഡ് ട്രീറ്റ്‌മെന്റ് സെന്ററാക്കി പ്രവര്‍ത്തനം തുടങ്ങിയത്.

പിന്നീട് കഴിഞ്ഞ മാസം ആദ്യം ഹൈക്കോടതി നിര്‍ദേശ പ്രകാരം അഞ്ചരക്കണ്ടി മെഡിക്കല്‍ കോളേജ് മാനേജ്‌മെന്റിന് വിട്ടു നല്‍കിയതോടെ കൊവിഡ് രോഗികളെ ഇവിടെ പ്രവേശിപ്പിക്കുന്നത് നിര്‍ത്തിയിരുന്നു.

ജില്ലാ കൊവിഡ് ചികിത്സാ കേന്ദ്രത്തില്‍ അവസാനമായി 10 പേര്‍ മാത്രമായിരുന്നു ചികിത്സയിലുണ്ടായിരുന്നത്. ഇവര്‍ രോഗം ഭേദമായി മടങ്ങിയതോടെ കൊവിഡ് ട്രീറ്റ്‌മെറ്റ് സെന്ററിന്റെ പ്രവര്‍ത്തനം അവസാനിപ്പിക്കുകയായിരുന്നു.

കൊവിഡ് പോസിറ്റീവായ 3807 പേരും ലക്ഷണങ്ങളോടെ പ്രവേശിപ്പിക്കപ്പെട്ട 840 പേരും ഉള്‍പ്പെടെ 4647 പേരെയാണ് അഞ്ചരക്കണ്ടി കൊവിഡ് ട്രീറ്റ്‌മെന്റ് സെന്ററില്‍ ഇതുവരെ പ്രവേശിപ്പിച്ചിരുന്നത്. 4626 പേരാണ് ഇവിടെ നിന്നും രോഗം ഭേദമായി ആശുപത്രി വിട്ടത്.

98 ദിവസം പ്രായമായ സ്ത്രീ മുതല്‍ അഞ്ച് ദിവസം പ്രായമായ കുഞ്ഞ് വരെ അഞ്ചരക്കണ്ടി കൊവിഡ് ട്രീറ്റ്‌മെന്റ് സെന്ററിലെ ചികിത്സയ്‌ക്കൊടുവില്‍ രോഗമുക്തരായി ആശുപത്രി വിട്ടിട്ടുണ്ട്. മറ്റ് രോഗങ്ങളുള്ള 1292 പേരും പ്രായമായ 725 പേരും 401 കുട്ടികളും 14 ഗര്‍ഭിണികളും ഇതില്‍ ഉള്‍പ്പെടും.

കഴിഞ്ഞ എട്ടുമാസ കാലയളവില്‍ 1686 ആരോഗ്യ പ്രവര്‍ത്തകരാണ് ഇവിടെ സേവനമനുഷ്ഠിച്ചത്. 135 ഡോക്ടര്‍മാരും 12 ഡെന്റല്‍ സര്‍ജന്‍മാരും 78 ഹെഡ് നഴ്‌സ്, 512 സ്റ്റാഫ് നഴ്‌സ്, 262 നഴ്‌സിംഗ് അസിസ്റ്റന്റ് 33 ഫാര്‍മസിസ്റ്റ്, 35 ജൂനിയര്‍ ഹെല്‍ത്ത് ഇന്‍സ്‌പെക്ടര്‍, 312 ഗ്രേഡ് 2 എന്നിവര്‍ ഉള്‍പ്പെടെയാണിത്.