വ്യാഴാഴ്ച്ച സ്വപ്ന ആ രഹസ്യങ്ങള്‍ വെളിപ്പെടുത്തും

കോടതിയോട് മാത്രം പറയാനുള്ള രഹസ്യ വിവരങ്ങള്‍ സ്വപ്‌ന സുരേഷ് വ്യാഴാഴ്ച്ച നല്‍കും. ഇക്കാര്യത്തിനായി
സ്വപ്ന സുരേഷുമായി സംസാരിക്കണമെന്ന അഭിഭാഷകന്‍ ജോ പോളിന്റെ അപേക്ഷ പ്രിന്‍സിപ്പല്‍ സെഷന്‍സ് കോടതി അനുവദിച്ചു.
കസ്റ്റംസിന്റെ കസ്റ്റഡി അവസാനിക്കുന്ന വ്യാഴാഴ്ച ഉച്ചയ്ക്കു 2.30 നു പ്രതിക്ക് അഭിഭാഷകനുമായി സംസാരിക്കാമെന്നാണ് ഇന്നലെ കോടതി അറിയിച്ചിരിക്കുന്നത്.
കോടതിയോടു മാത്രമായി ചില കാര്യങ്ങള്‍ ബോധിപ്പിക്കാനുണ്ടെന്നു സ്വപ്നയും സരിത്തും ഇന്നലെയാണ് അറിയിച്ചത് . പലകാര്യങ്ങളും തുറന്നുപറയാന്‍ കഴിയാത്ത അവസ്ഥയുണ്ടെന്നും പ്രതികള്‍ ബോധിപ്പിച്ചു. തുടര്‍ന്നാണ് പറയാനുള്ളതു മുഴുവന്‍ എഴുതി അഭിഭാഷകന്‍ വഴി കൈമാറാന്‍ കോടതി നിര്‍ദേശിച്ചത്.

സ്വര്‍ണക്കടത്തില്‍ കൂടുതല്‍ വിദേശപൗരന്മാര്‍ക്കും ഡോളര്‍ കടത്തില്‍ ഒന്നിലധികം പേര്‍ക്കുമുള്ള പങ്കാളിത്തം വെളിപ്പെടുത്തുന്ന സ്വപ്ന സുരേഷിന്റെ മൊഴികള്‍ അന്വേഷണ സംഘം മുദ്രവച്ച കവറില്‍ സാമ്പത്തിക കുറ്റവിചാരണക്കോടതിയില്‍ സമര്‍പ്പിച്ചു.

സ്വപ്നയുടെ മൊഴികളെ വളരെ ആശങ്കയോടെയാണു കാണുന്നതെന്നു കോടതി ഉത്തരവില്‍ പരാമര്‍ശിച്ചു. ദേശദ്രോഹക്കുറ്റം ആരോപിക്കപ്പെടുന്ന സ്വര്‍ണക്കടത്തില്‍ കോണ്‍സുലേറ്റിനു പുറത്തുള്ള കൂടുതല്‍ വിദേശികള്‍ പങ്കാളികളാണെന്ന വെളിപ്പെടുത്തല്‍ അതീവഗൗരവ സ്വഭാവമുള്ളതാണ്.