സ്വര്‍ണകടത്ത് : ഉദ്യോഗസ്ഥര്‍ക്കെതിരെ കോടതി

സ്വര്‍ണകടത്ത് കേസില്‍ കസ്റ്റംസ് കോടതിയില്‍ സീല്‍വെച്ച കവറില്‍ നല്‍കിയ മൊഴിയിലെ വിവരങ്ങള്‍ എന്ന രീതിയില്‍ വാര്‍ത്ത പരക്കുന്നതില്‍ കോടതിക്ക് അതൃപ്തി.
മൊഴി ചോര്‍ച്ച സംബന്ധിച്ച് ഉത്തരവാദിത്വപ്പെട്ട ഉദ്യോഗസ്ഥനെതിരേ നടപടിയെടുക്കണമെന്നും കോടതി ആവശ്യപ്പെട്ടു. ഇക്കാര്യത്തില്‍ എന്ത് നടപടിയാണ് എടുത്തതെന്നത് സീല്‍ വെച്ച കവറില്‍ കസ്റ്റംസ് കമ്മീഷണര്‍ അറിയിക്കണമെന്നും കോടതി ആവശ്യപ്പെട്ടു.

കേസില്‍ കസ്റ്റംസിന്റെ അന്വേഷണ പുരോഗതി നിരീക്ഷിക്കാന്‍ കോടതി തീരുമാനം. മൂന്ന് മാസം കൂടുമ്പോള്‍ അന്വേഷണ റിപ്പോര്‍ട്ട് കോടതിക്ക് സമര്‍പ്പിക്കണം.

നീതിപൂര്‍വമായി കാര്യങ്ങള്‍ നടക്കണമെങ്കില്‍ മേല്‍നോട്ട പ്രക്രിയ ആവശ്യമാണ് എന്ന നീരീക്ഷണവും കോടതി നടത്തി. കൃത്യമായ വിവരങ്ങള്‍ നല്‍കാത്തതില്‍ വിമര്‍ശിച്ചതിന് പിന്നാലെയാണ് കോടതി ഇക്കാര്യങ്ങള്‍ പറഞ്ഞത്.
സ്വപ്ന നല്‍കിയ ഹര്‍ജിയിലാണ് നടപടി. മാധ്യമങ്ങള്‍ക്കെതിരെ നടപടി വേണമെന്ന ആവശ്യം കോടതി തള്ളി.

മൊഴി ചോര്‍ത്തി നല്‍കിയത് ഗുരുതര വീഴ്ചയെന്നാണ് കോടതിയുടെ വിലയിരുത്തല്‍. അന്വേഷണ ഉദ്യോഗസ്ഥര്‍ നടത്തിയ അധാര്‍മിക പ്രവൃത്തികള്‍ സഹിക്കാനാകില്ല. ഉദ്യോഗസ്ഥര്‍ സത്യസന്ധതയോടെ പ്രവര്‍ത്തിക്കണം. ലിറ്റര്‍ കണക്കിന് പാലും തേനും നശിപ്പിക്കാന്‍ ഒരു തുള്ളി വിഷംമാത്രം മതി. വിഷമേതെന്ന് കണ്ടുപിടിക്കാനുള്ള മാര്‍ഗമില്ലാതെ അന്വേഷണം മുന്നോട്ടുപോകുന്നത് ബുദ്ധിപരമാണോയെന്നും കോടതി ചോദിച്ചു.

ശരിയായ അന്വേഷണം നടത്താതെ വിചാരണ ആരംഭിക്കുന്നത് വിദൂര സാധ്യതയാണ്. നീതി നടപ്പാക്കണമെങ്കില്‍ അന്വേഷണത്തിന് മേല്‍നോട്ടം വളരെ അത്യാവശ്യമാണെന്നും കോടതി വ്യക്തമാക്കി.മുന്‍ ഐടി സെക്രട്ടറി എം ശിവശങ്കറിനെ ആറ് ദിവസം കസ്റ്റംസ് കസ്റ്റഡിയില്‍ വിട്ടു. സ്വര്‍ണക്കടത്തിനു പിന്നില്‍ വന്‍ സ്രാവുകളുണ്ടെന്ന് കോടതി നിരീക്ഷിച്ചു. ഇവരുടെ പങ്കാളിത്തം മനഃസാക്ഷിയെ ഞെട്ടിപ്പിക്കുന്നതാണെന്നും കോടതി വിലയിരുത്തി.