‘കണ്ണാ ബണ്ണീങ്കതാ കൂട്ടമാവറും സിങ്കം സിംഗിളാതാ വറും ‘ രജനീകാന്തിന്റെ പാർട്ടി 31ന്

ചെന്നൈ : ‘ജനുവരിയിൽ പാർട്ടി തുടങ്ങും. ഔദ്യോഗിക പ്രഖ്യാപനം ഈ മാസം 31ന്. എല്ലാം മാറും. അദ്ഭുതവും അതിശയവും സംഭവിക്കും’- രണ്ടര പതിറ്റാണ്ടിലേറെയായി തമിഴ്നാട് രാഷ്ട്രീയത്തിലുയർന്നു കേൾക്കുന്ന ആകാംക്ഷാഭരിതമായ ചോദ്യത്തിനു ട്വീറ്റിലൂടെ സൂപ്പർ താരം രജനീകാന്ത് പൂർണ വിരാമമിട്ടു.

കോവിഡ് സാഹചര്യത്തിൽ ആരോഗ്യം മുൻനിർത്തി പിന്മാറാൻ ഡോക്ടർമാർ ഉപദേശിച്ചെന്നും എന്നാൽ, ജനങ്ങൾക്കിടയിലേക്കിറങ്ങി പ്രവർത്തിച്ചു മരിക്കാനും തയാറെടുത്താണ് തീരുമാനമെന്നും രജനി വ്യക്തമാക്കി.

രജനി മക്കൾ മൻട്രം

എംജിആർ ഭരണമാണു രജനിയുടെ വാഗ്ദാനം. ആരാധക കൂട്ടായ്മയെ രാഷ്ട്രീയ യൂണിറ്റുകളാക്കി മാറ്റിയാണു എംജിആർ അണ്ണാഡിഎംകെ കെട്ടിപ്പടുത്തത്. 3 വർഷം മുൻപ് രാഷ്ട്രീയ പ്രവേശനം പ്രഖ്യാപിച്ചതിനു പിന്നാലെ ആരാധക കൂട്ടായ്മ രജനി മക്കൾ മൻട്രമാക്കി.രജനിക്ക് 20-25% വോട്ടുവരെ ഒറ്റയ്ക്കു നേടാനാകുമെന്നാണു മക്കൾ മൻട്രത്തിന്റെ സ്വകാര്യ സർവേയിൽ കണ്ടെത്തിയത്.

നിലവിൽ 1 ലക്ഷം യൂണിറ്റുകൾ. 16 ജില്ലകളിൽ എല്ലാ ബൂത്തിലും സാന്നിധ്യം. 10 ഇടത്ത് 60% ബൂത്തുകളിൽ അംഗങ്ങൾ. അടിത്തറ ഭദ്രമെന്നുറപ്പാക്കിതന്നെയാണു രജനിയുടെ രാഷ്ട്രീയ എൻട്രി എന്നർത്ഥം.