ട്രഷറിയിലെ സ്ഥിരനിക്ഷേപ സര്‍ട്ടിഫിക്കറ്റ് വ്യാജമായി നിര്‍മിച്ച് തട്ടിപ്പ്

ട്രഷറിയിലെ സ്ഥിരനിക്ഷേപ സര്‍ട്ടിഫിക്കറ്റ് വ്യാജമായി നിര്‍മിച്ച് തട്ടിപ്പ്. പാലക്കാട് നഗരസഭയിലാണ് കരാറുകാരന്‍ വ്യാജ സര്‍ട്ടിഫിക്കറ്റ് നിര്‍മിച്ചത് നല്‍കിത്. അന്വേഷണം ആവശ്യപ്പെട്ട് പാലക്കാട് നഗരസഭ സെക്രട്ടറി പൊലീസിന് പരാതി നല്‍കി. പൊതുമരാമത്ത് കരാറുകള്‍ക്ക് തുകയുടെ അഞ്ച് ശതമാനം പണി തുടങ്ങുന്നതിന് മുന്‍പ് ബാങ്കിലെ സ്ഥിരനിക്ഷേപ സര്‍ട്ടിഫിക്കറ്റ് ഗ്യാരന്റി നല്‍കണമെന്നാണ് വ്യവസ്ഥ. ഇതില്‍ കുറഞ്ഞത് രണ്ടര ശതമാനമെങ്കിലും ട്രഷറിയില്‍ നിന്നുള്ള സ്ഥിര നിക്ഷേപ സര്‍ട്ടിഫിക്കറ്റ് ഗ്യാരന്റിയായി വേണമെന്നാണ് നിര്‍ബന്ധമുണ്ട്. ഇതിലാണ് വലിയ വെട്ടിപ്പ് നടത്തിയത്. കഴിഞ്ഞ മാസം പാലക്കാട് നഗരസഭക്ക് കീഴിലെ 4 പ്രവര്‍ത്തിക്കികള്‍ക്ക് ഒരു കരാറുകാരന്‍ നല്‍കിയത് ജില്ലാ ട്രഷറിയില്‍ നിന്നുള്ള ഒരു സര്‍ട്ടിഫിക്കറ്റ്. 25000 രൂപ സ്ഥിരനിക്ഷേപം നടത്തി സര്‍ട്ടിഫിക്കറ്റ് എടുത്ത കാസര്‍കോട് സ്വദേശി ഇതിന്റെ മൂന്ന് കളര്‍ ഫോട്ടോസ്റ്റാറ്റ് എടുത്ത് മറ്റ് മൂന്ന് കരാറുകള്‍ക്ക് കൂടി നല്‍കി.
നാല് ഗ്യാരന്റിയില്‍ ഒരേ നമ്പര്‍ കണ്ട നഗരസഭാ ഉദ്യോഗസ്ഥനാണ് തട്ടിപ്പ് കണ്ടെത്തിയത്. ഉടന്‍ ട്രഷറി ഉദ്യോഗസ്ഥരെ വിവരമറിയിച്ചതോടെ തട്ടിപ്പാണെന്ന് വ്യക്തമായി. വ്യാജ സര്‍ട്ടിഫിക്കറ്റുകളെല്ലാം ഒരു ഉദ്യോഗസ്ഥന് മുന്നിലെത്തിയതിനാലാണ് ഇത് ഇപ്പോള്‍ പുറത്ത് വന്നത്. പല പല സ്ഥാപനങ്ങളിലേക്കാണെങ്കില്‍ ഇത് തിരിച്ചറിയില്ലായിരുന്നു. മലപ്പുറം ചങ്ങരംകുളം ട്രഷറിയില്‍ 2018ല്‍ സമാനമായ തട്ടിപ്പ് കണ്ടെത്തിയതാണ്. അന്ന് അന്വേഷണസംഘം നല്‍കിയ പ്രധാനനിര്‍ദ്ദേശങ്ങളിലൊന്ന് എഫ്.ഡി സര്‍ട്ടിഫിക്കറ്റില്‍ ഹോളോ ഗ്രാം പതിപ്പിക്കണമെന്നാണ്. അത് നടപ്പാക്കിയിരുന്നുവെങ്കില്‍ വീണ്ടും തട്ടിപ്പ് നടക്കില്ലായിരുന്നു.