മദീനയില്‍ മലയാളി കുടുംബം അപകടത്തില്‍പ്പെട്ട് മൂന്ന് പേര്‍ മരിച്ചു

മക്ക-മദീന ഹൈവെയിലുണ്ടായ വാഹനാപകടത്തില്‍ മലയാളി ദമ്പതികളും മകളും മരിച്ചു. മദീന സന്ദര്‍ശനം കഴിഞ്ഞ് തായ്ഫിലേക്ക് മടങ്ങുകയായിരുന്ന മലയാളി കുടുംബം സഞ്ചരിച്ച കാറാണ് അപകടത്തില്‍പെട്ടത്. മലപ്പുറം പെരുവള്ളൂര്‍ ചാത്രത്തൊടി സ്വദേശി തൊണ്ടിക്കോടന്‍ അബ്ദുള്‍ റസാഖ് (49), ഭാര്യ ഫാസില, മകള്‍ ഫാത്തിമ റസാന്‍ എന്നിവരാണ് മരിച്ചത്. മറ്റൊരു മകളെ പരുക്കുകളോടെ ആശുപത്രിയില്‍ പ്രവേശിപ്പിച്ചു. മക്കാ മദീന ഹൈവേയില്‍ മദീനയില്‍ നിന്ന് 140 കിലോമീറ്റര്‍ അകലെ അംന എന്ന സ്ഥലത്ത് വച്ചാണ് അപകടമുണ്ടായത്. അപകടത്തെ തുടര്‍ന്ന് അബ്ദുറസാക്കും ഭാര്യ ഫാസില കുറ്റാരിയും സംഭവ സ്ഥലത്ത് വച്ച് തന്നെ മരണപ്പെട്ടതയാണ് വിവരം.മകള്‍ ആശുപത്രിയില്‍ വെച്ചാണ് മരിച്ചത്. താഇഫിലായിരുന്നു റസാഖ് ജോലി ചെയ്തിരുന്നത്.ഇവിടെ ഫാമിലി വിസയിലായിരുന്നു കുടുംബം. അപകടസ്ഥലത്തേക്ക് മലയാളി സന്നദ്ധ സംഘടനകളും ബന്ധുക്കളും തിരിച്ചിട്ടുണ്ട്.