തെരഞ്ഞെടുപ്പില്‍ പൊട്ടിയാല്‍ പള്ളിയും തലയും തെറിക്കും

തദ്ദേശ തെരഞ്ഞെടുപ്പില്‍ കഴിഞ്ഞ തവണ നേടിയ സീറ്റുകളെങ്കിലും നേടാനായില്ലങ്കില്‍ ഇനി മുല്ലപ്പള്ളി രാമചന്ദ്രനും കെപിസിസി അധ്യക്ഷ സ്ഥാനത്ത് നിന്നും രമേശ് ചെന്നിത്തലപ്രതിപക്ഷ നേതൃസ്ഥാനത്തൂു നിന്നും രാജിവയ്‌ക്കേണ്ടി വരും. ഇതിനായി ആന്ധ്ര മോഡലായിരിക്കും പാര്‍ട്ടിയിലെ എതിരാളികളും ചൂണ്ടിക്കാട്ടുക. വലിയ വെല്ലുവിളിയാണ് ചെന്നിത്തലയും മുല്ലപ്പള്ളിയും നേരിടുന്നത്. ഇവിടെ വീണാല്‍ നിയമസഭ തെരഞ്ഞെടുപ്പ് യുഡിഎഫിനെ സംബന്ധിച്ച് ശരിക്കും അഗ്‌നി പരീക്ഷണമാകും. പിണറായി സര്‍ക്കാറിനെതിരെ ബിജെപി കൂടി സഹായിച്ച് നിരവധി വിവാദങ്ങള്‍ ഉയര്‍ത്തികൊണ്ടുവന്നിട്ടും നേട്ടമുണ്ടാക്കാന്‍ സാധിച്ചില്ലങ്കില്‍ യുഡിഎഫ് ഘടക കക്ഷികള്‍ക്കും ആത്മവിശ്വാസം നഷ്ടപ്പെടും. ബിജെപിക്കും മികച്ച പ്രകടനം അനിവാര്യമാണ്. നിലവിലെ അവസ്ഥയെങ്കിലും നിലനിര്‍ത്താന്‍ കഴിഞ്ഞില്ലങ്കില്‍ ബിജെപിയിലും കലാപക്കൊടി ഉയരും. ഇപ്പോള്‍ തന്നെ കെ.സുരേന്ദ്രനെതിരെ ഒരു വിഭാഗം അവസരം നോക്കി നില്‍ക്കുകയാണ്.
തെലങ്കാന കോണ്‍ഗ്രസ് അദ്ധ്യക്ഷന്‍ എന്‍ ഉത്തംകുമാര്‍ റെഡ്ഡിയുടെ രാജിയില്‍ ഞെട്ടിയത് കേരളത്തിലെ കോണ്‍ഗ്രസ് നേതൃത്വമാണ് ഗ്രേറ്റര്‍ ഹൈദരാബാദ് മുന്‍സിപ്പല്‍ കോര്‍പ്പറേഷന്‍ തിരഞ്ഞെടുപ്പിലെ കോണ്‍ഗ്രസ്സിന്റെ ദയനീയ പരാജയത്തിന് പിന്നാലെയാണ് ധാര്‍മ്മിക ഉത്തരവാദിത്വം ഏറ്റെടുത്ത് ഉത്തംകുമാര്‍ രാജിവച്ചിരിക്കുന്നത്. പിസിസി അദ്ധ്യക്ഷസ്ഥാനം താന്‍ ഒഴിയുകയാണെന്നും അടുത്ത പാര്‍ട്ടി അദ്ധ്യക്ഷനെ ഉടന്‍ തെരഞ്ഞെടുക്കണമെന്നും ആവശ്യപ്പെട്ട് അദ്ദേഹം കോണ്‍ഗ്രസ് അദ്ധ്യക്ഷയ്ക്ക് കത്തയച്ചിട്ടുമുണ്ട്.
ഇടത് പരാജയമാണെന്ന് പൊതുവേ പറഞ്ഞ് നടന്നിരുന്നെങ്കിലും തദ്ദേശ തെരഞ്ഞെടുപ്പ് പ്രചരണത്തില്‍ ഇടതുപക്ഷത്തിന് ഒപ്പം എത്തുന്നില്ലന്ന വിമര്‍ശനം യുഡിഎഫില്‍ മാത്രമല്ല ബിജെപിയിലും ശക്തമാണ്. പ്രചരണ രംഗത്ത് ഇടതുപക്ഷം ഏറെ മുന്നിലാണ്. തദ്ദേശ തെരഞ്ഞെടുപ്പ് പ്രചാരണാര്‍ഥം എല്ലാ വാര്‍ഡ് കേന്ദ്രങ്ങളിലും വെബ് റാലി സംഘടിപ്പിച്ചതും ചുവപ്പിന്റെ വേറിട്ട പ്രചരണ രീതിയാണ്. ഇതു വഴി 50 ലക്ഷം പേരെ കര്‍മ്മനിരതരാക്കാന്‍ പറ്റുമെന്നതാണ് ഇടതുപക്ഷത്തിന്റെ കണക്ക് കൂട്ടല്‍. കൊവിഡ് സാഹചര്യത്തില്‍ റാലികളും പൊതുയോഗങ്ങളും നടത്താന്‍ കഴിയാത്തതിനാലാണ് വെബ് റാലിയിലേക്ക് ഇടതുപക്ഷം മാറി ചിന്തിച്ചിരുന്നത്. മുഖ്യമന്ത്രി പിണറായി വിജയന്‍ ഉള്‍പ്പെടെയുള്ളവര്‍ ഓണ്‍ലൈന്‍ വഴിയാണ് പ്രചരണത്തിന് നേതൃത്വം കൊടുക്കുന്നത്. ഇടതു നേതാക്കളുടെ പ്രസംഗങ്ങള്‍ എല്ലാ വാര്‍ഡു കേന്ദ്രങ്ങളിലും തല്‍സമയം ബിഗ്സ്‌ക്രീനില്‍ പ്രദര്‍ശിപ്പിക്കുന്ന പ്രചരണ രീതി ഇതിനകം തന്നെ ശ്രദ്ധ പിടിച്ചു പറ്റിയിട്ടുണ്ട്.
കൊവിഡ് പശ്ചാത്തലത്തില്‍ പോളിങ് കുറഞ്ഞാല്‍ അതും ഇടതുപക്ഷത്തിനാണ് ഏറെ ഗുണം ചെയ്യുകയെന്നാണ് രാഷ്ട്രിയ നിരീക്ഷകരും ചൂണ്ടിക്കാട്ടുന്നത്. അവസാനത്തെ പാര്‍ട്ടി വോട്ടും ചെയ്യിപ്പിക്കുക എന്നതാണ് സിപിഎം കീഴ്ഘടകങ്ങള്‍ക്ക് നല്‍കിയിരിക്കുന്ന നിര്‍ദ്ദേശം. തദ്ദേശ തെരഞ്ഞെടുപ്പില്‍ മികച്ച വിജയം നേടാന്‍ കഴിഞ്ഞാല്‍ നിയമസഭ തെരഞ്ഞെടുപ്പില്‍ അനായാസമായി തുടര്‍ ഭരണം സാധ്യമാകുമെന്നാണ് ഇടതുപക്ഷം കണക്ക് കൂട്ടുന്നത്.