മുഖ്യമന്ത്രി നാട്ടില്‍ എത്തി തിരക്കുകളില്ല

286 ദിവസത്തിനു ശേഷം കണ്ണൂരിലെത്തിയ മുഖ്യമന്ത്രി പിണറായി വിജയന്‍ കൊവിഡ് പ്രോട്ടോക്കോള്‍ പാലിച്ച് കണ്ണൂരില്‍ തുടരുന്നു. കഴിഞ്ഞ ഫെബ്രുവരി 23ന് ആയിരുന്നു ഇതിനു മുന്‍പ് മുഖ്യമന്ത്രി പിണറായിയിലെ വീട്ടിലെത്തിയത്.
തിരഞ്ഞെടുപ്പ് വരെ മുഖ്യമന്ത്രി വീട്ടിലുണ്ടാകും. വോട്ട് ചെയ്ത ശേഷമാകും മടക്കം.
സ്വന്തം നിയോജക മണ്ഡലമായ ധര്‍മടത്ത് വിവിധ പഞ്ചായത്തുകളുടെ എല്‍ഡിഎഫ് തിരഞ്ഞെടുപ്പു കമ്മിറ്റി യോഗത്തില്‍ പങ്കെടുത്തു. കോവിഡ് നിയന്ത്രണ മാനദണ്ഡം പാലിക്കേണ്ടതിനാല്‍ ആള്‍ക്കൂട്ടത്തെ ഒഴിവാക്കുന്നതിന്റെ ഭാഗമായാണു പൊതു തിരഞ്ഞെടുപ്പു പരിപാടികളില്‍ മുഖ്യമന്ത്രി നേരിട്ടു പങ്കെടുക്കാത്തത്.

രാഷ്ട്രീയത്തിന് അപ്പുറമുള്ള ബന്ധങ്ങള്‍ക്ക് വില കൊടുക്കാന്‍ കൂടി വേണ്ടിയായിരുന്നുമുഖ്യമന്ത്രിയുടെ കണ്ണൂര്‍ യാത്ര.
കണ്ണൂരില്‍ എത്തിയ പിണറായി ആദ്യം ഓടിയെത്തിയത് ആത്മാര്‍ഥ സുഹൃത്തായിരുന്ന രൈരു നായരുടെ ഓര്‍മകള്‍ നിറയുന്ന മേലൂരിലെ വീട്ടിലേക്ക്. സ്വാതന്ത്ര്യസമര സേനാനിയായിരുന്ന രൈരു നായരുടെ മരണം കൊവിഡ് കാലത്തായിരുന്നതിനാല്‍ മുഖ്യമന്ത്രിക്ക് എത്താന്‍ കഴിഞ്ഞിരുന്നില്ല. അപ്രതീക്ഷിതമായാണു മുഖ്യമന്ത്രിയും ഭാര്യ കമലയും മകള്‍ വീണയും കഴിഞ്ഞ ദിവസം രാത്രി രൈരു നായരുടെ വീട്ടില്‍ എത്തിയത്. അര മണിക്കൂര്‍ രൈരു നായരുടെ കുടുംബാംഗങ്ങളുമൊത്തു ചെലവഴിച്ചു.

രൈരു നായരുടെ ഭാര്യ നാരായണിക്കുട്ടിയുടെ ആരോഗ്യ വിവരവും മുഖ്യമന്ത്രി ചോദിച്ചറിഞ്ഞു. രൈരു നായരുടെ മൂത്ത മകളായ പ്രവീണ, അവരുടെ ഭര്‍ത്താവ് സുരേഷ് മേനോന്‍ എന്നിവരും വീട്ടിലുണ്ടായിരുന്നു. മരിച്ച മറ്റ് ചിലരുടെ വീട്ടിലും പിണറായി എത്തി. സിപിഐഎം പിണറായി നോര്‍ത്ത് ബ്രാഞ്ച് സെക്രട്ടറി പട്ട്വം മോഹനന്‍, ദീര്‍ഘകലം അഭിഭാഷകനായിരുന്ന ചേറ്റം കുന്നിലെ വി.ബാലന്‍, പിണറായി പണ്ട്യാലമുക്കിലെ തട്ടാരി ഭരതന്‍ എന്നിവരുടെ വീടുകളാണ് സന്ദര്‍ശിച്ചത്.

11 വരെയാണു ജില്ലയിലുള്ളത്. എന്നാല്‍ മണ്ഡലത്തിലെ പഞ്ചായത്ത് തിരഞ്ഞെടുപ്പു കമ്മിറ്റികളുടെ യോഗത്തില്‍ പങ്കെടുക്കും. കഴിഞ്ഞ വെള്ളിയാഴ്ച വരാനാണ് ആദ്യം പദ്ധതിയിട്ടത്. എന്നാല്‍ ചുഴലിക്കാറ്റ് ഭീഷണിയെ തുടര്‍ന്ന് തിരുവനന്തപുരം വിമാനത്താവളത്തിന്റെ പ്രവര്‍ത്തനം പരിമിതപ്പെടുത്തിയതിനാലാണ് യാത്ര മാറ്റിയതും.