തിരഞ്ഞെടുപ്പു കമ്മീഷന്‍ കടുപ്പിച്ചാല്‍ തച്ചങ്കരി ഡി ജി പി

കേന്ദ്രതിരഞ്ഞെടുപ്പ് കമ്മീഷന്‍ കര്‍ശന നിലപാട് എടുത്താല്‍ കേരളത്തിന്റെ ഡി ജി പി സ്ഥാനത്ത് ടോമിന്‍ ജെ തച്ചങ്കരി എത്തും.
സംസ്ഥാന പൊലീസ് മേധാവി പദവിയില്‍ ലോക്‌നാഥ് ബെഹ്‌റ നാല് വര്‍ഷമാവുകയാണ്. മൂന്ന് വര്‍ഷം ഒരേ പദവിയില്‍ തുടരുന്ന പൊലീസ് ഉദ്യോഗസ്ഥരെ നിയമസഭ തിരഞ്ഞെടുപ്പിന് മുന്‍പ് മാറ്റണമെന്ന് നിയമമുണ്ട്. ഇതാണ് ബെഹ്‌റയുടെ മാററത്തിന് ഇടയാക്കുന്നത്.
മുഖ്യ തിരഞ്ഞെടുപ്പ് ഓഫിസര്‍ ചീഫ് സെക്രട്ടറിയുമായി അനൗദ്യോഗിക ചര്‍ച്ചകള്‍ നടത്തിയെങ്കിലും ഔദ്യോഗിക ചര്‍ച്ചകള്‍ ജനുവരിയിലേ തുടങ്ങു. ബെഹ്‌റയെ മാറ്റുന്ന കാര്യത്തില്‍ ചെറിയ ഒരു തടസ്സം സര്‍ക്കാരിനു മുന്നിലുണ്ട്.
അടുത്ത ജൂണില്‍ അദേഹം വിരമിക്കും. വിരമിക്കാന്‍ ആറ് മാസം മാത്രമുള്ള സമയത്ത് സ്ഥലം മാറ്റരുതെന്ന ചട്ടത്തില്‍ തീരുമാനം എടുക്കേണ്ടത് തിരഞ്ഞെടുപ്പ് കമ്മിഷനാണ്. ഇത് സംബന്ധിച്ച് കമ്മീഷന്‍ നിലപാട് വന്നാല്‍ ബഹ്‌റ മാറും.
അങ്ങനെ ഒരു സാഹചര്യം വന്നാല്‍ ആ സ്ഥാനത്തേക്ക് എത്തുക എ ഡി ജി പി ടോമിന്‍ ജെ തച്ചങ്കരി ആയിരിക്കുമെന്നാണ് സൂചന.
കാരണം ആര്‍.ശ്രീലേഖ, ഋഷിരാജ് സിങ്, ടോമിന്‍ തച്ചങ്കരി, അരുണ്‍കുമാര്‍ സിന്‍ഹ, സുദേഷ്‌കുമാര്‍ എന്നിവരാണ് ഡിജിപി പദവിക്കായി പരിഗണനയിലുള്ളവര്‍. ശ്രീലേഖ ഈ മാസം വിരമിക്കും. ഋഷിരാജ് ജൂലായില്‍ വിരമിക്കുന്നതിനാല്‍ ആറ് മാസമെങ്കിലും കാലാവധിയുള്ളരെ പൊലീസ് മേധാവിയാകാവൂവെന്ന മാനദണ്ഡം അദേഹത്തിന് തടസമാവും.

പ്രധാനമന്ത്രിയുടെ ഉള്‍പ്പെടെ സുരക്ഷാചുമതലയുള്ള എസ്പിജി ഡയറക്ടറായി തുടരുന്ന അരുണ്‍കുമാര്‍ സിന്‍ഹ കേരളത്തിലേക്ക് മടങ്ങാനും സാധ്യതയില്ല. ഇതാണ് ടോമിന്‍ തച്ചങ്കരിയിലേക്ക് എത്താനുള്ള വഴി തുറക്കുന്നത്. സുദേഷ്‌കുമാര്‍ പരിഗണിക്കപ്പെടാവുന്ന ഉദ്യോഗസ്ഥനാണെങ്കിലും കൂടുതല്‍ സാധ്യത തച്ചങ്കരിക്കാന്‍ എല്ലാവരും കല്‍പ്പിക്കുന്നത്.