നമ്മുടെ പ്രധാനമന്ത്രിയുടെ ഒരു ആഗ്രഹമെ… അത് അങ്ങ് സമ്മതിച്ചു കൊടുത്തേര്…

ഉദ്ഘാടനത്തിന് ഒരുങ്ങുന്ന ബൈപാസിലൂടെ മന്ത്രി ജി.സുധാകരന്റെ കന്നിയാത്ര. നിര്‍മാണ പ്രവര്‍ത്തനങ്ങള്‍ അവലോകനം ചെയ്യുന്നതിനു കളര്‍കോട് മുതല്‍ കൊമ്മാടി വരെ ആറര കിലോമീറ്ററും തിരിച്ചുമായിരുന്നു യാത്ര. മുന്‍പ് പലതവണ സന്ദര്‍ശിച്ചിട്ടുണ്ടെങ്കിലും തടസ്സങ്ങളില്ലാതെ പൂര്‍ണമായും ബൈപാസിലൂടെ യാത്ര നടത്താന്‍ സാധിച്ചത് ഇന്നലെയാണ്. പാലത്തിനു താഴെയുള്ള കാടും നിര്‍മണാവശിഷ്ടങ്ങളും നീക്കി വൃത്തിയാക്കുന്നതും ജംക്ഷന്‍ വികസനത്തിന്റെ ഭാഗമായ റൗണ്ട് നിര്‍മാണവുമാണു ബാക്കി. അത് രണ്ടാഴ്ചയ്ക്കുള്ളില്‍ പൂര്‍ത്തിയാകുമെന്നു മന്ത്രി പറഞ്ഞു. ബൈപാസ് ഉദ്ഘാടനം ചെയ്യണമെന്ന് പ്രധാനമന്ത്രി നരേന്ദ്രമോദി ആഗ്രഹം അറിയിച്ചതനുസരിച്ച് മുഖ്യമന്ത്രി ക്ഷണിച്ചിട്ടുണ്ട്. 50 വര്‍ഷത്തെ കാത്തിരിപ്പാണ്. പ്രധാനമന്ത്രിയുടെ തീയതി ലഭിച്ചാലുടന്‍ ഉദ്ഘാടനം നടത്തും. മുഖ്യമന്ത്രിയും പങ്കെടുക്കും. കോവിഡ് നിയന്ത്രണം പാലിച്ചായിരിക്കും ഉദ്ഘാടനം.
ബൈപാസില്‍ ടോളിനു കേന്ദ്ര ഗവണ്‍മെന്റ് നടപടി സ്വീകരിച്ചിട്ടുണ്ടെന്നു മന്ത്രി പറഞ്ഞു. 100 കോടി രൂപയ്ക്കു മേലുള്ള റോഡ്, പാലം നിര്‍മാണത്തില്‍ കേന്ദ്ര നിലപാട് അതാണ്. 176 കോടി രൂപ സംസ്ഥാന സര്‍ക്കാരാണ് ചെലവഴിച്ചത്. അതിനാല്‍ ടോള്‍ ഒഴിവാക്കണമെന്നു സംസ്ഥാനം ആവശ്യപ്പെട്ടെങ്കിലും അവര്‍ ഉറച്ചുനില്‍ക്കുന്നു. അതിനോട് യോജിക്കുന്നില്ലെന്നും, ടോള്‍ തുകയുടെ വിഹിതം സംസ്ഥാനം വാങ്ങില്ലെന്നും മന്ത്രി പറഞ്ഞു.ബൈപാസ് നിര്‍മാണം ആലപ്പുഴ നഗരത്തിലുള്‍പ്പെടെ വന്‍ വിജയം നേടാനും നഗരസഭാ ഭരണം തിരിച്ചു പിടിക്കാനും സഹായിച്ചതായി മന്ത്രി ജി.സുധാകരന്‍. 1991ലെ ജില്ലാ കൗണ്‍സില്‍ തിരഞ്ഞെടുപ്പിനു ശേഷം ജില്ലയിലുണ്ടാകുന്ന വന്‍ വിജയമാണിത്. വാചകമടിയല്ല, പ്രഖ്യാപനങ്ങള്‍ ജനങ്ങളുടെ അനുഭവത്തില്‍ വരുമ്പോഴാണ് അവര്‍ പിന്തുണയ്ക്കന്നത്. അവകാശവാദം ഉന്നയിക്കുന്നില്ല. ബൈപാസ് എല്‍ഡിഎഫിന്റേതല്ല, സര്‍ക്കാരിന്റേതും ജനങ്ങളുടേതുമാണെന്നും മന്ത്രി പറഞ്ഞു.