നഗരസഭകളിലും പിടിമുറക്കി ഇടത് മുന്നണി; സ്വതന്ത്രരുടെ പിന്തുണയോടെ 42 നഗരസഭകളില്‍ ഭരണം ഉറപ്പിച്ചു

തദ്ദേശ തെരഞ്ഞെടുപ്പില്‍ നഗരസഭകളിലും പിടിമുറക്കി ഇടത് മുന്നണി. സ്വതന്ത്രരുടെ പിന്തുണ കൂടി നേടിയപ്പോള്‍ 42 നഗരസഭകളില്‍ ഇടതുമുന്നണി ഭരണം ഉറപ്പിച്ചു. 33 ഇടങ്ങളിലാണ് യുഡിഎഫ് ഭരണം. തെരഞ്ഞെടുപ്പ് കമ്മീഷനറെ വെബ് സൈറ്റില്‍ മുന്‍സിപ്പാലിറ്റി വാര്‍ഡുകളിലെ കണക്കില്‍ മാറ്റം വരുത്തി. ഫലപ്രഖ്യാപനത്തിന് ശേഷം തെരഞ്ഞെടുപ്പ് കമ്മീഷന്‍ വെബ് സൈറ്റില്‍ 45 മുന്‍സിപ്പാലിറ്റികളില്‍ യുഡിഎഫ് ഭരണവും 35 ഇടത്ത് എല്‍ഡിഎഫുമായിരുന്നു. എല്‍ഡിഎഫ് സ്വതന്ത്രരെ സ്വതന്ത്രരായി കണക്കാക്കിയതായിരുന്നു ഇതിന് കാരണം. ഇടത് സ്വതന്ത്രരുടേയും യുഡിഎഫ് വിമതരുടേയും പിന്തുണ കൂടി ഉറപ്പാക്കിയതോടെ മുന്‍സിപ്പാലിറ്റികളിലും ഇടതിന് ആധിപത്യം ഉറപ്പിക്കാനായി.
42 നഗരസഭകളില്‍ എല്‍ഡിഎഫിന് ഭരണം ലഭിക്കും. യുഡിഎഫ് ഭരണം 33 നഗരസഭകളിലാണ്. കമ്മീഷന്‍ സൈറ്റില്‍ മുന്‍സിപ്പാലിറ്റികളുടെ ഭരണം ആര്‍ക്കെന്ന വിവരം മാറ്റി ജയിച്ച വാര്‍ഡുകളുടെ എണ്ണം മാത്രമാക്കി തിരുത്തി. ഇത് പ്രകാരം 85 നഗരസഭകളില്‍ ഇടത് മുന്നണി 1167 വാര്‍ഡുകളും, യുഡിഎഫ് 1172 വാര്‍ഡുകളും നേടി. സ്വതന്ത്രര്‍ 416 വാര്‍ഡുകളാണ് നേടിയത്. പാലക്കാടും പന്തളത്തും എന്‍ഡിഎയാണ്. ആര്‍ക്കും ഭൂരിപക്ഷമില്ലാത്ത 10 ഇടങ്ങളില്‍ ഇപ്പോഴും അനിശ്ചിതത്വം തുടരുകയാണ്. കമ്മീഷന്റെ സൈറ്റില്‍ ആദ്യം വന്ന കണക്ക് ഉന്നയിച്ച് മുന്‍സിപ്പിലാറ്റികള്‍ കൂടതല്‍ പിടിച്ചുവെന്ന് യുഡിഎഫ് അവകാശപ്പെട്ടിരുന്നു.