അടിച്ചിറയിൽ വാഹനാപകടം; 12 പേർക്ക് പരിക്ക്

എം.സി റോഡിൽ അടിച്ചിറയിൽ ടെമ്പോ ട്രാവലറും മിനി ലോറിയും കൂട്ടിയിടിച്ചുണ്ടായ അപകടത്തിൽ പന്ത്രണ്ട് പേർക്ക് പരിക്ക്. സാരമായി പരിക്കേറ്റ ഏഴു പേരെ മെഡിക്കൽ കോളേജ് ആശുപത്രിയിലും അഞ്ചു പേരെ അടുത്തുള്ള സ്വകാര്യ ആശുപത്രിയിലും പ്രവേശിപ്പിച്ചു. പുലർച്ചെ ഒരു മണിയോടെ എം.സി റോഡിൽ ഏറ്റുമാനൂർ അടിച്ചിറ വളവിന് സമീപമായിരുന്നു അപകടം.തമിഴ്‌നാട് തെങ്കാശി സ്വദേശികളും തൃശൂരിലും പെരുമ്പാവൂരിലും സ്ഥിരതാമസക്കാരുമായ നാഗൂർ മൊയ്തീൻ, സുലൈഹാൾ, മുഹമ്മദ് ആദം, അമീർ, നത്തോട് ബാദുഷ, മുഹമ്മദ് ഹനീഷ, മൊയ്തീൻ എന്നിവർക്കാണ് പരിക്കേറ്റത്. ഏറ്റുമാനൂരിൽ നിന്നും കോട്ടയം ഭാഗത്തേയ്ക്കു വരികയായിരുന്ന ടെമ്പോ ട്രാവലർ എതിർ ദിശയിൽ നിന്നും എത്തിയ മിനി ലോറിയിൽ ഇടിക്കുകയായിരുന്നു. രണ്ടു വാഹനങ്ങളുടെയും മുൻ ഭാഗം പൂർണമായും തകർന്നു. വാഹനത്തിൽ കുടുങ്ങിയവരെ കോട്ടയത്തുനിന്നും ഫയർഫോഴ്സ് എത്തി വാഹനം വെട്ടിപ്പൊളിച്ചാണ് പുറത്തെടുത്തത്.