ലീഗ് സ്ഥാനാര്‍ഥിയുടെ വിജയാഘോഷത്തിന് സ്വര്‍ണക്കടത്ത് കേസിലെ പ്രതിയും

കൊടുവള്ളിയില്‍ യുഡിഎഫ് സ്ഥാനാര്‍ഥിയുടെ ആഹ്‌ളാദപ്രകടനം നയിച്ചത് സ്വര്‍ണക്കടത്ത് കേസിലെ പ്രതി അബുലൈസ്. മോഡേണ്‍ബസാറില്‍ നിന്ന് ജയിച്ച ലീഗ് സ്വതന്ത്രസ്ഥാനാര്‍ഥി പി.കെ. സൂബൈറിന്റെ വിജയത്തിന് പിന്നില്‍ പ്രവര്‍ത്തിച്ചതും അബുലൈസാണെന്നാണ് സൂചന. കരിപ്പൂര്‍ കേന്ദ്രീകരിച്ച് 39 കിലോ സ്വര്‍ണം കടത്തിയ കേസില്‍ പ്രതിയാണ് അബുലൈസ്.കൊടുവള്ളി മോഡേണ്‍ ബസാറില്‍ നിന്ന് ജയിച്ച മുസ്ലിം ലീഗിലെ പി.കെ. സുബൈറിന്റെ ആഹ്‌ളാദപ്രകടനത്തിലെ ദൃശ്യങ്ങളിലാണ് അബുലൈസിന്റെ സാന്നിധ്യം. ജീപ്പിന് മുകളിലിരുന്നാണ് അബുലൈസ് വിജയാഘോഷത്തില്‍ പങ്കെടുത്തതെന്നാണ് പുറത്ത് വന്ന ദൃശ്യങ്ങള്‍. യുഡിഎഫ് ധാരണ അനുസരിച്ച് മോഡേണ്‍ബസാര്‍ വാര്‍ഡിലെ സ്ഥാനാര്‍ഥി കോണ്‍ഗ്രസിലെ നൂര്‍ മുഹമ്മദായിരുന്നു. നൂര്‍മുഹമ്മദ് പിന്‍വാങ്ങുകയും ലീഗിലെ പി.കെ. സുബൈര്‍ സ്ഥാനാര്‍ഥിയാവുകയും ചെയ്തപ്പോള്‍ തന്നെ ദൂരൂഹതയുണ്ടായിരുന്നു. നൂര്‍മുഹമ്മദ് പിന്‍മാറിയതിന് പിന്നില്‍ സാമ്പത്തിക പ്രലോഭനമാണെന്നും ആരോപണമുയര്‍ന്നു കഴിഞ്ഞു. ഫലപ്രഖ്യാപനത്തോടെ ഇതിന് പിന്നില്‍ പ്രവര്‍ത്തിച്ചതാരെന്ന് സൂചന നല്‍കുന്നതാണ് പരസ്യമായി അബുലൈസിന്റെ ആഹ്‌ളാദ പ്രകടനം. കരിപ്പൂര്‍ വഴി 39 കിലോ സ്വര്‍ണം കടത്തിയ കേസില്‍ ഒളിവില്‍ പോയ അബൂലൈസ് പിന്നീട് കോഫേപോസ കേസില്‍ പ്രതിയായി ജയിലിലായിരുന്നു. കൊടുവള്ളിയില്‍ ഇടതുമുന്നണി സ്ഥാനാര്‍ഥി കാരാട്ട് ഫൈസലിന്റെ സ്വര്‍ണക്കടത്ത് ബന്ധം നേരത്തെ വിവാദമായിരുന്നു.