കൊറോണ വാക്സിന്‍ ആവശ്യപ്പെട്ട് 12 രാജ്യങ്ങള്‍ ഇന്ത്യയെ സമീപിച്ചു

ന്യൂഡല്‍ഹി: കൊറോണ വാക്സിന്‍ നല്‍കണമെന്ന് ആവശ്യപ്പെട്ട് 12 രാജ്യങ്ങള്‍ ഇന്ത്യയെ സമീപിച്ചതായി ഉന്നത മന്ത്രിതല യോഗത്തില്‍ നീതി ആയോഗ് അംഗം ഡോ വി കെ പോള്‍ അറിയിച്ചു. വിദേശകാര്യ മന്ത്രി എസ് ജയശങ്കര്‍, വ്യോമയാനമന്ത്രി ഹര്‍ദ്ദീപ് സിംഗ് പുരി, കേന്ദ്ര ആരോഗ്യ സഹമന്ത്രി അശ്വനി കുമാര്‍, ആഭ്യന്തര സഹമന്ത്രി നിത്യാനന്ദ റായ് എന്നിവര്‍ യോഗത്തില്‍ പങ്കെടുത്തു.

അതേസമയം വാക്സിന്‍ ലഭ്യമായി കഴിഞ്ഞാല്‍ രാജ്യത്തെ ഒരു കോടിയോളം വരുന്ന ആരോഗ്യ പ്രവര്‍ത്തകര്‍ക്കും കൊറോണ പ്രതിരോധ പ്രവര്‍ത്തനങ്ങളില്‍ മുന്‍നിരയില്‍ നിന്നും പ്രവര്‍ത്തിച്ച രണ്ടു കോടിയോളം ആളുകള്‍ക്കും 50 വയസിന് മുകളില്‍ പ്രായമുള്ളതും മറ്റ് ഗുരുതര രോഗങ്ങളാല്‍ ബുദ്ധിമുട്ട് അനുഭവിക്കുന്നവരുമായ 270 മില്യണ്‍ ആളുകള്‍ക്കുമാണ് ആദ്യ ഘട്ടത്തില്‍ വാക്സിന്‍ വിതരണം ചെയ്യേണ്ടതെന്ന് നാഷണല്‍ എക്സ്പേര്‍ട്ട് ഗ്രൂപ്പ് ഓണ്‍ വാക്സിന്‍ അഡ്മിനിസ്ട്രേഷന്‍ മന്ത്രിതല യോഗത്തെ അറിയിച്ചു.

വികെ പോള്‍ ആണ് നാഷണല്‍ എക്സ്പേര്‍ട്ട് ഗ്രൂപ്പ് ഓണ്‍ വാക്സിന്‍ അഡ്മിനിസ്ട്രേഷന്റെ അദ്ധ്യക്ഷന്‍.നിലവില്‍ രാജ്യത്ത് നടക്കുന്ന വാക്സിന്‍ പരീക്ഷണങ്ങളുടെ പുരോഗതി യോഗത്തില്‍ വിലയിരുത്തി. രാജ്യത്തെ വാക്സിന്‍ നിര്‍മ്മാതാക്കളെ കുറിച്ചും വാക്സിന്‍ ലഭ്യതയെ കുറിച്ചും സംഭരണത്തെ കുറിച്ചുമുള്ള വിശദാംശങ്ങളും വി കെ പോള്‍ യോഗത്തില്‍ വിശദീകരിച്ചു.ഭാരത് ബയോടെകും ഐസിഎംആറും സംയുക്തമായി വികസിപ്പിക്കുന്ന കൊവാക്സിന്‍, ഫൈസര്‍, ഓക്സ്ഫഡ്- സെറം ഇന്‍സ്റ്റിറ്റ്യൂട്ട് വികസിപ്പിച്ച കൊവീഷീല്‍ഡ് എന്നീ വാക്സിനുകള്‍ അടിയന്തര വിതരണത്തിന് അനുമതി തേടി അപേക്ഷ നല്‍കിയിട്ടുണ്ടെന്നും പോള്‍ കൂട്ടിച്ചേര്‍ത്തു.