അങ്കമാലിയില്‍ പെണ്‍കുട്ടിയെ ബലാത്സംഗം ചെയ്ത കേസില്‍ യുവാവ് പിടിയില്‍

കൊച്ചി: അങ്കമാലിയില്‍ പെണ്‍കുട്ടിയെ സ്വകാര്യ ലാബിനുള്ളില്‍ പൂട്ടിയിട്ട് ബലാത്സംഗം ചെയ്ത കേസില്‍ പത്തൊന്‍പത് വയസ് മാത്രം പ്രായമുളള മുന്‍കാമുകനായ യുവാവ് അറസ്റ്റില്‍. അങ്കമാലി മേക്കാട് കൂരന്‍ വീട്ടില്‍ ബേസില്‍ ബാബുവിനെയാണ് അങ്കമാലി പോലീസ് പിടികൂടിയത്. ലാബ് ടെക്‌നീഷ്യനായി ജോലിചെയ്യുന്ന 19-കാരിക്ക് നേരേ കഴിഞ്ഞദിവസമാണ് അതിക്രമമുണ്ടായത്.

ഇരുവരും നേരത്തെ അടുപ്പത്തിലായിരുന്നു. എന്നാല്‍ യുവാവ് ലഹരി മരുന്ന് ഉപയോഗിക്കാറുണ്ടെന്ന് അറിഞ്ഞതോടെ പെണ്‍കുട്ടി ബന്ധത്തില്‍നിന്ന് പിന്മാറി. യുവാവ് പലതവണ വിവാഹാഭ്യര്‍ഥന നടത്തിയെങ്കിലും യുവതി നിരസിച്ചു. വാട്‌സാപ്പും ഫോണ്‍നമ്ബറും ബ്ലോക്ക് ചെയ്തു. എന്നാല്‍ യുവാവ് പിന്നീട് അമ്മയുടെ ഫോണില്‍ നിന്ന് പെണ്‍കുട്ടിയെ വിളിക്കാന്‍ തുടങ്ങി. ശല്യം തുടര്‍ന്നതോടെ ഈ നമ്പറും ബ്ലോക്ക് ചെയ്തു. ഇതിനു പിന്നാലെയാണ് കഴിഞ്ഞദിവസം പെണ്‍കുട്ടിയെ ബലാത്സംഗം ചെയ്തത്. കേസെടുത്ത അങ്കമാലി പോലീസ് പ്രതിയെ ഇന്നാണ് പിടികൂടിയത്.