സംസ്ഥാനത്തെ തദ്ദേശ തെരഞ്ഞെടുപ്പില്‍ അഞ്ചരലക്ഷം വോട്ടിന് എല്‍ഡിഎഫ് മുന്നില്‍

തിരുവനന്തപുരം: സംസ്ഥാനത്ത് നടന്ന തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പില്‍ അഞ്ചരലക്ഷം വോട്ടിന് എല്‍ഡിഎഫ് മുന്നില്‍. ജില്ലാപഞ്ചായത്ത് അടിസ്ഥാനത്തിലാണ് എല്‍ഡിഎഫിന് യുഡിഎഫിനേക്കാള്‍ അഞ്ചരലക്ഷം വോട്ടിന്റെ ലീഡ ലഭിച്ചത്്. 11 ജില്ലാ പഞ്ചായത്തില്‍ എല്‍ഡിഎഫ് ഭരണമാണ്. വയനാട്ടില്‍ ഒപ്പത്തിനൊപ്പവും. സംസ്ഥാന തെരഞ്ഞെടുപ്പ് കമീഷന്‍ പുറത്തുവിട്ട അന്തിമ കണക്കുകളില്‍നിന്ന് വ്യക്തമാകുന്നത് കേരളത്തിന്റെ ഗ്രാമീണ മേഖലയിലാകെ 5,49,264 വോട്ടിന്റെ ഭൂരിപക്ഷം എല്‍ഡിഎഫിനുണ്ട്. തദ്ദേശ തെരഞ്ഞെടുപ്പില്‍ വ്യക്തമായ രാഷ്ട്രീയ സ്വഭാവത്തോടെ പൊതുവില്‍ പരിഗണിക്കുന്നത് ജില്ലാപഞ്ചായത്തിലേക്കുള്ള വോട്ടുകളാണ്. സിപിഐ എമ്മിനു മാത്രമായി 44,81,824 വോട്ട് ലഭിച്ചപ്പോള്‍ കോണ്‍ഗ്രസിന് 42,99,497 വോട്ടും ബിജെപിക്ക് 23,96,528 വോട്ടുമാണ് നേടാനായത്. എല്‍ഡിഎഫില്‍ സിപിഐക്ക് 12,89,980 വോട്ടും കേരള കോണ്‍ഗ്രസ് എമ്മിന് 4,98,115 വോട്ടും ലഭിച്ചു. മുസ്ലിംലീഗിന് കിട്ടിയത് 15,41,456 വോട്ടാണ്. ജില്ലാ ഡിവിഷനുകളില്‍ മൂന്നില്‍രണ്ടും എല്‍ഡിഎഫ് പിടിച്ചടക്കി. ആകെയുള്ള 331 സീറ്റില്‍ 212. യുഡിഎഫിന് 110 സീറ്റില്‍ ഒതുങ്ങേണ്ടിവന്നു. ബിജെപിക്ക് ആകെയുള്ളത് രണ്ട് സീറ്റ് മാത്രം.

ബ്ലോക്ക് പഞ്ചായത്ത് അടിസ്ഥാനത്തില്‍ നോക്കിയാല്‍ സിപിഐ എമ്മിന് 51,12,076 വോട്ട് ലഭിച്ചപ്പോള്‍ കോണ്‍ഗ്രസിന് കിട്ടിയത് 48,97,024 വോട്ടുമാത്രം. 152 ബ്ലോക്കില്‍ 105 എണ്ണത്തിലും എല്‍ഡിഎഫിന് വ്യക്തമായ ഭൂരിപക്ഷമുണ്ട്. ആകെയുള്ള 2080 ബ്ലോക്ക് ഡിവിഷനില്‍ 1266 ഇടത്തും എല്‍ഡിഎഫിനാണ് വിജയം. ഇതില്‍ 961ഉം സിപിഐ എമ്മിനാണ്. സിപിഐക്ക് 211. യുഡിഎഫിന് വെറും 727. ബിജെപിക്ക് 37. ഗ്രാമപഞ്ചായത്ത് വാര്‍ഡുകളുടെ എണ്ണത്തില്‍ യുഡിഎഫിന് ആകെ ലഭിച്ചതിനേക്കാള്‍ സീറ്റ് സിപിഐ എമ്മിന് മാത്രമായി ലഭിച്ചു. യുഡിഎഫിന് 5893. സിപിഐ എമ്മിന് മാത്രമായി 5947. സ്വതന്ത്രരെ കൂട്ടാതെ എല്‍ഡിഎഫിനാകെ 7262 സീറ്റ് ലഭിച്ചപ്പോള്‍ യുഡിഎഫിനുള്ളത് 5893. ബിജെപിക്ക് ആകെയുള്ളത് 1182 സീറ്റ്. കേരള കോണ്‍ഗ്രസ് മാണി വിഭാഗം 257 സീറ്റ് നേടിയപ്പോള്‍ ജോസഫ് വിഭാഗത്തിനുള്ളത് 178 സീറ്റ്. 1425 സ്വതന്ത്രരും വിജയിച്ചു.