പത്തനംതിട്ടയില്‍ ഭരണം എല്‍ഡിഎഫിന്, എസ്ഡിപിഐ വോട്ടെടുപ്പില്‍ നിന്ന് വിട്ടു നില്‍ക്കും

യുഡിഎഫ്, എല്‍ഡിഎഫ് മുന്നണികള്‍ക്ക് ഒരുപോലെ കക്ഷിനിലയുളള പത്തനംതിട്ട നഗരസഭയില്‍ ഭരണം എല്‍ഡിഎഫിന്. മൂന്ന് സീറ്റുകളുള്ള എസ്.ഡി.പി.ഐ വോട്ടെടുപ്പില്‍ നിന്ന് വിട്ടു നില്‍ക്കുമെന്ന് തീരുമാനിച്ചതോടെയാണ് ഭരണം എല്‍ഡിഎഫിന് ലഭിക്കുമെന്ന് ഉറപ്പായത്. ഇരുമുന്നണികളും നേരത്തെ എസ്ഡിപിഐയുടെ പിന്തുണ വേണ്ടെന്ന് പരസ്യമായി പറഞ്ഞിരുന്നു. സിപിഎം ജില്ലാ കമ്മിറ്റി അംഗം കൂടിയായ എല്‍ഡിഫിലെ ടി സക്കീര്‍ ഹുസൈന്‍ പത്തനംതിട്ട നഗരസഭാ ചെയര്‍മാന്‍ ആകുമെന്നാണ് വിവരം. രണ്ടു സ്വതന്ത്രരുടേതുള്‍പ്പെടെ 15 പേരുടെ പിന്തുണയാണ് നിലവില്‍ എല്‍ഡിഎഫിനുള്ളത്.

ആകെ 32 സീറ്റുകളുള്ള നഗരസഭയില്‍ എല്‍ഡിഎഫിനും യുഡിഎഫിനും 13 സീറ്റുകള്‍ വീതമാണുള്ളത്. എസ് ഡി പിഐക്ക് മൂന്ന് സീറ്റുകളുള്ളപ്പോള്‍ മൂന്ന് സ്വതന്ത്രരും ഉണ്ട്. ഇതിലൊരാള്‍ എസ് ഡി പിഐ പിന്തുണയോടെയാണ് ജയിച്ചത്. ഇവരുടെ പിന്തുണ നേരിട്ട് ലഭിക്കുകയാണെങ്കില്‍ എസ് ഡിപിഐ പിന്തുണ എല്‍ഡിഎഫ് നേടിയെന്ന ആക്ഷേപം ഉയരുമെന്നുറപ്പാണ്. ഇക്കാര്യത്തില്‍ ഇന്ന് നടക്കുന്ന വോട്ടെടുപ്പിന് ശേഷമേ വ്യക്തത വരികയുള്ളു.