മേയറായതിന് പിന്നാലെ ടി.ഒ. മോഹനന് കുരുക്ക് : ബിജെപി നേതാവിനൊപ്പമുള്ള ടൂര്‍ ചിത്രങ്ങള്‍

കണ്ണൂര്‍ കോര്‍പ്പറേഷന്‍ മേയറായതിന്റെ ആഘോഷം അടങ്ങും മുന്‍പ് കോണ്‍ഗ്രസ് നേതാവ് ടി.ഒ. മോഹനനെ പ്രതിരോധത്തിലാക്കി ചിത്രങ്ങള്‍ സോഷ്യല്‍ മീഡിയയില്‍ വൈറലാകുന്നു. ബിജെപി സംസ്ഥാന സെക്രട്ടറി രഞ്ജിത്തിനൊപ്പമുള്ള ടൂര്‍ ചിത്രങ്ങളാണ് വൈറലായത്.കോര്‍പ്പറേഷനിലെ ചില ഡിവിഷനുകളില്‍ ബിജെപിക്ക് വോട്ടു കൂടിയതും ചിലയിടങ്ങളില്‍ ബിജെപി വോട്ട് മറിച്ചതും എന്തുകൊണ്ടാണെന്ന് ഈ ചിത്രങ്ങള്‍ പറയുമെന്ന് കാട്ടിയാണ് സോഷ്യല്‍ മീഡിയയില്‍ ഇവ പ്രചരിക്കുന്നത്.
കണ്ണൂര്‍ കോര്‍പ്പറേഷന്‍ മേയര്‍ സ്ഥാനാര്‍ഥിയാകാന്‍ കോണ്‍ഗ്രസിനകത്ത് കടുത്ത മത്സരം നടന്നിരുന്നു. തെരഞ്ഞെടുപ്പില്‍ പി.കെ. രാഗേഷിനെ തോല്‍പ്പിച്ച് മോഹനന്‍ ജയിച്ചതോടെയാണ് ചിത്രങ്ങള്‍ പുറത്തുവന്നത്. പി.കെ. രാഗേഷിന്റെ അടുത്ത അനുയായികളാണ് ചിത്രങ്ങള്‍ പുറത്തുവിട്ടതെന്ന് ചിത്രത്തിനൊപ്പമുള്ള കുറിപ്പില്‍ പറയുന്നു. സംഭവത്തില്‍ മോഹനനോ രാഗേഷോ ഇതുവരെ പ്രതികരിച്ചിട്ടില്ല. കോണ്‍ഗ്രസിനകത്തെ തമ്മിലടി നേതാക്കളെ അപകീര്‍ത്തിപ്പെടുത്തുന്നതിലേക്ക് മാറിയത് സംസ്ഥാന നേതൃത്വത്തിന്റെ ശ്രദ്ധയിലെത്തിയിട്ടുണ്ട്. കണ്ണൂരില്‍ ബിജെപി കോണ്‍ഗ്രസ് കൂട്ടുകെട്ടിന് ചുക്കാന്‍ പിടിക്കുന്നവരില്‍ പ്രമുഖരാണ് രഞ്ജിത്തും മോഹനനുമെന്നാണ് ഇപ്പോള്‍ കോണ്‍ഗ്രസിനുള്ളില്‍ തന്നെയുള്ള സംസാരം. കോര്‍പ്പറേഷന്‍ ഭരണത്തിന്റെ തുടക്കത്തില്‍ തന്നെ കല്ലുകടിയായതോടെ മോഹനന് മേയര്‍ സ്ഥാനത്ത് അഞ്ചു വര്‍ഷം പൂര്‍ത്തിയാക്കുക എളുപ്പമാകില്ല.
പി.കെ. രാഗേഷിനെ കോര്‍പ്പറേഷന്‍ മേയറാക്കാനായിരുന്നു കെ, സുധാകരന്റെ താത്പര്യം. എന്നാല്‍, കഴിഞ്ഞ തെരഞ്ഞെടുപ്പില്‍ വിമതനായി കോണ്‍ഗ്രസിനെ കാലുവാരിയ രാഗേഷിനെ മേയറാക്കാന്‍ ഒരുവിഭാഗം തയ്യാറായില്ല. ഇതേതുടര്‍ന്ന് കോണ്‍ഗ്രസ് കൗണ്‍സിലര്‍മാര്‍ക്കിടയില്‍ വോട്ടെടുപ്പ് നടത്തിയാണ് മേയര്‍ സ്ഥാനാര്‍ഥിയെ കണ്ടെത്തിയത്. ടി.ഒ. മോഹനന് പതിനൊന്നും പി.കെ. രാഗേഷിന് ഒമ്പതും വോട്ടുകിട്ടി. രാഗേഷിനുവേണ്ടി കൗണ്‍സിലര്‍മാരെ സ്വാധീനിക്കാന്‍ സുധാകരന്റെ നേതൃത്വത്തില്‍ ഇടപെടല്‍ നടത്തിയെങ്കിലും കാര്യമുണ്ടായില്ല.കണ്ണൂര്‍ കോര്‍പ്പറേഷനില്‍ 55ല്‍ 34 സീറ്റാണ് യുഡിഎഫിന് ലഭിച്ചത്. ചാല ഡിവിഷനില്‍നിന്ന് തെരഞ്ഞെടുക്കപ്പെട്ട ടി.ഒ. മോഹനന്‍ കെപിസിസി അംഗമാണ്. കണ്ണൂര്‍ കോര്‍പ്പറേഷന്‍ ഒഴിച്ചു നിര്‍ത്തിയാല്‍ തദ്ദേശ തെരഞ്ഞെടുപ്പില്‍ ജില്ലയില്‍ കാര്യമായ നേട്ടമുണ്ടാക്കാന്‍ കോണ്‍ഗ്രസിന് കഴിഞ്ഞിട്ടില്ല.